വിദ്യാര്‍ത്ഥികള്‍ക്ക് പനി, ഛര്‍ദി: സ്‌കൂളിലെ കുടിവെള്ളത്തില്‍ ഇ കോളി,കോളിഫോം ബാക്ടീരിയ സാന്നിധ്യം സ്ഥിരീകരിച്ചു
കല്‍പ്പറ്റ: സെന്റ് ജോസഫ് കോണ്‍വെന്റ് സ്‌കൂളിലെ വിദ്യാര്‍ഥികള്‍ക്ക് പനി, ഛര്‍ദി തുടങ്ങിയ രോഗലക്ഷണങ്ങള്‍ പ്രകടമായതിനെ തുടര്‍ന്ന് ആരോഗ്യവകുപ്പ് അധികൃതര്‍ സ്‌കൂളിലെ കുടിവെള്ള സ്രോതസ്സുകളില്‍ നടത്തിയ പരിശോധനയില്‍ ഇ കോളിയും, കോളിഫോം ബാക്ടീരിയയും കണ്ടെത്തിയതായി ആരോഗ്യ വകുപ്പ് അധികൃതര്‍ അറിയിച്ചു. സ്‌കൂളിലെ കിണര്‍ വെള്ളത്തില്‍ കോളിഫോം ബാക്ടീരിയയും, ഇ കോളിയും, വാട്ടര്‍ ഫില്‍റ്ററുകളില്‍ കോളിഫോം ബാക്ടീരിയയുമാണ് കണ്ടെത്തിയത്. നിലവില്‍ രണ്ട് ദിവസമായി സ്‌കൂള്‍ അടച്ചിട്ടിരിക്കുകയാണ്. കിണറും, ഫില്‍റ്ററുകളും ശുചീകരിച്ച ശേഷം വീണ്ടും പരിശോധന നടത്തി ബോധ്യപ്പെട്ടാല്‍ മാത്രമേ സ്‌കൂള്‍ തുറക്കുകയുള്ളൂ.നിലവില്‍ 71 വിദ്യാര്‍ത്ഥികള്‍ ചികിത്സ തേടിയതായും, ഇവരുടെ സമ്പര്‍ക്കത്തിലുള്ള നിരവധി പേരും ചികിത്സ തേടിയതായും ആരോഗ്യ വകുപ്പ് അറിയിച്ചു. നേരെത്തെ കുടിവെള്ള സ്രോതസ്സുകള്‍
ശുചീകരിക്കുന്നതിനും, രോഗവ്യാപനം തടയുന്നതിനുമായി ഒരാഴ്ചത്തേക്ക് സ്‌കൂള്‍ അടച്ചിടാന്‍ ആരോഗ്യവകുപ്പ് നിര്‍ദ്ദേശം നല്‍കിയിരുന്നു.
ജില്ലാ ആരോഗ്യ വകുപ്പ് അധികൃതരും, കല്‍പ്പറ്റ ജനറല്‍ ആശുപത്രി ഹെല്‍ത്ത് ഇന്‍സ്‌പെക്ടര്‍ പി.കെ നവാസ്, ജെഎച്ച് ഐ മാരായ സുധ കെ.വി, സുരേഷ് കുമാര്‍, സെബിന്‍ വര്‍ഗീസ് എന്നിവരുമടങ്ങിയ സംഘമാണ് പരിശോധനയില്‍ പങ്കെടുത്തത്. ജനറല്‍ ആശുപത്രി ആര്‍.എം.ഒ ഡോ. ശുഭ മെഡിക്കല്‍ പരിശോധനകള്‍ക്ക് നേതൃത്വം നല്‍കി.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍