മീനങ്ങാടി: മീനങ്ങാടി, കൊളഗപ്പാറയില്‍ വന്‍ കഞ്ചാവ് വേട്ട. രണ്ട് ദിവസങ്ങള്‍ക്ക് മുമ്പ് ഒരു കിലോ കഞ്ചാവുമായി പിടിയിലായ എ.ടി.എസ് സാന്‍ഡ്‌സ് ആന്‍ഡ് ക്രഷേഴ്‌സ് എന്ന സ്ഥാപനത്തിലെ മാനേജരായ പുത്തന്‍കുന്ന്, മാക്കുറ്റി, പേളക്കുടി വീട്ടില്‍, എബി ഏലിയാസിന്റെ (35) മുറിയില്‍ നിന്ന് 24.164 കിലോഗ്രാം കഞ്ചാവ് പിടിച്ചെടുത്തു. ഇന്നലെ വൈകിട്ടോടെ നടത്തിയ പരിശോധനയിലാണ് വാണിജ്യ അളവില്‍ കഞ്ചാവ് കണ്ടെത്തിയത്. ഇയാളുടെ കൂട്ടാളി പുത്തന്‍കുന്ന്, മാക്കുറ്റി, തേക്കുംകാട്ടില്‍ പുട്ട് എന്ന ടി.ആര്‍. നിഥുനെ(35) പോലീസ് കസ്റ്റഡിയിലെടുത്തു.വില്‍പ്പനക്കായി കടത്തി കൊണ്ടുവന്ന  ഒരു കിലോയിലധികം കഞ്ചാവുമായി നവംബര്‍ ഒന്നിന് മാക്കുറ്റി പാലത്തിനടുത്ത് വെച്ച്  എബി ഏലീയാസിനെ ജി്ല്ലാ ലഹരി വിരുദ്ധ സ്‌ക്വാഡും ബത്തേരി ഡിവൈ.എസ്.പിയുടെ സ്‌ക്വാഡും ബത്തേരി പോലീസും ചേര്‍ന്ന് പിടികൂടിയിരുന്നു. തുടര്‍ന്ന് എബിയുടെ മാക്കുറ്റിയിലെ വീട്ടില്‍ നടത്തിയ പരിശോധനയില്‍ 7 ഗ്രാം കഞ്ചാവ് കണ്ടെത്തിയിരുന്നു. ഇയാളെ അറസ്റ്റ് ചെയ്ത് കൂടുതല്‍ ചോദ്യം ചെയ്തതില്‍ നിന്നും ലഭിച്ച വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് വലിയ അളവില്‍ കഞ്ചാവ് കണ്ടെത്തിയത്. ക്രഷറിലെ എബിയുടെ മുറിയിലെ കട്ടിലിന്റെ അടിയിലെ പെട്ടിയില്‍ 12 പാക്കറ്റുകളിലായി സൂക്ഷിച്ച നിലയിലായിരുന്നു കഞ്ചാവ്. ഒറീസയില്‍ നിന്നുമാണ് കഞ്ചാവ് വാങ്ങിയതെന്നാണ് പ്രാഥമിക വിവരം. പോലീസ് കൂടുതല്‍ അന്വേഷണം നടത്തി വരികയാണ്.  

ജില്ലാ പോലീസ് മേധാവി എസ്. ദേവമനോഹര്‍ ഐ.പി.എസിന്റെ നിര്‍ദേശപ്രകാരം നാര്‍കോട്ടിക് ആന്‍ഡ് ജന്‍ഡര്‍ ജസ്റ്റിസ് ഡിവൈ.എസ്.പി മനോഹരന്‍. ടിയുടെ കീഴിലെ ജില്ലാ ലഹരി വിരുദ്ധ സ്‌ക്വാഡും, ബത്തേരി ഡി.വൈ.എസ്.പി എം.എം. അബ്ദുള്‍ കരീമിന് കീഴിലുള്ള സ്‌ക്വാഡും, മീനങ്ങാടി സി.ഐ ബിജു ആന്റണി, എസ്.ഐ സി.നൗഫല്‍, എസ്.സി.പി.ഓമാരായ പ്രവീണ്‍, കെ.എസ് സുരേഷ്, സി.പി.ഒ.മാരായ എന്‍.എ. തോമസ്, എം.എ. അര്‍ജുന്‍, കെ.എസ് അജിന്‍, വി.എം മജീഷ് എന്നിവരാണ് പോലീസ് സംഘത്തിലുണ്ടായിരുന്നത്.