വയനാട് റവന്യൂ ജില്ലാ ശാസ്‌ത്രോത്സവം നവംബര്‍ 6 ന് ആരംഭിക്കും
മാനന്തവാടി: വിദ്യാര്‍ഥികളുടെ ശാസ്ത്രാഭിരുചിയും സര്‍ഗാത്മകവും അന്വേഷണാത്മകവുമായ കഴിവുകളും പ്രോത്സാഹിപ്പിക്കുക എന്ന ലക്ഷ്യത്തോടെ സംഘടിപ്പിക്കുന്ന 45-ാമത് വയനാട് റവന്യൂ ജില്ലാ ശാസ്ത്രഗണിതസാമൂഹ്യപ്രവൃത്തിപരിചയവിവരസാങ്കേതിക മേളയ്ക്ക് നവംബര്‍ ആറിന് തുടക്കമാകും. മാനന്തവാടി എം.ജി.എം ഹയര്‍ സെക്കന്‍ഡറി സ്‌കൂളില്‍ ഉച്ചയ്ക്ക് രണ്ടിന് കൃഷി വകുപ്പ് മന്ത്രി അഡ്വ. ടി. സിദ്ദീഖ് ഉദ്ഘാടനം ചെയ്യും. എം.എല്‍.എ ഉഷാ വിജയന്‍ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണന്‍ മുഖ്യാതിഥിയാകും. ശാസ്ത്രം, ഗണിതശാസ്ത്രം, സാമൂഹ്യശാസ്ത്രം, പ്രവൃത്തിപരിചയം, വിവരസാങ്കേതികവിദ്യ എന്നീ വിഭാഗങ്ങളിലായി വിവിധ മത്സരങ്ങളും പ്രദര്‍ശനങ്ങളും നടക്കും.
ശാസ്ത്രമേളയില്‍ തത്സമയ നിര്‍മ്മാണ മത്സരങ്ങള്‍, സെമിനാര്‍ പേപ്പര്‍ അവതരണം, പ്രദര്‍ശനം എന്നിവയും വിവിധ മത്സരങ്ങളും സംഘടിപ്പിക്കും. സാമൂഹ്യശാസ്ത്രമേളയില്‍ പ്രാദേശിക ചരിത്രരചന, ചരിത്ര സെമിനാര്‍, വിവരസാങ്കേതിക മേളയില്‍ ആനിമേഷന്‍, ഡിജിറ്റല്‍ പെയിന്റിങ്, സ്‌ക്രാച്ച് പ്രോഗ്രാമിങ്, വെബ് പേജ് ഡിസൈനിങ് തുടങ്ങിയ മത്സരങ്ങളും നടക്കും. മേളയുടെ ഭാഗമായി ഗോത്രായനം ഫോട്ടോ പ്രദര്‍ശനം, കുടുംബശ്രീ ഉത്പന്നങ്ങളുടെ പ്രദര്‍ശനവും വില്‍പ്പനയും ഉള്‍പ്പെടെയുള്ള പരിപാടികളും ഒരുക്കിയിട്ടുണ്ട്. നവംബര്‍ ഏഴിന് നടക്കുന്ന സമാപന സമ്മേളനം എം.എല്‍.എ ഐ.സി. ബാലകൃഷ്ണന്‍ ഉദ്ഘാടനം ചെയ്യും. എം.എല്‍.എ ഉഷാ വിജയന്‍ അധ്യക്ഷത വഹിക്കും. പൊതുജനങ്ങള്‍ക്കും പ്രദര്‍ശനങ്ങള്‍ കാണാന്‍ അവസരമുണ്ടാകും.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍