മാനന്തവാടി: മനക്കരുത്തും കഠിനാധ്വാനവും കൈമുതലാക്കി ഹിമാലയത്തിന്റെ കൊടുംതണുപ്പിലും കുത്തനെയുള്ള മലമ്പാതകളിലും 42 കിലോമീറ്റര്‍ ഓടിത്തീര്‍ത്ത് ആദി കൈലാസ് മാരത്തണില്‍ 60 വയസ്സിന് മുകളിലുള്ളവരുടെ വിഭാഗത്തില്‍ ഒന്നാം സ്ഥാനം നേടി തോണിച്ചാല്‍ ദ്വാരക സ്വദേശി തോമസ് പള്ളിത്താഴത്ത്. ഉത്തരാഖണ്ഡ് സര്‍ക്കാരും ടൂറിസം വകുപ്പും ചേര്‍ന്ന് ഒക്ടോബര്‍ 24ന് സംഘടിപ്പിച്ച മത്സരത്തില്‍ നാല് മണിക്കൂര്‍ 24 മിനിറ്റ് 14 സെക്കന്‍ഡിലാണ് തോമസ് ഫിനിഷ് ചെയ്തത്. 50 വയസ്സിന് മുകളിലുള്ളവരുടെ വിഭാഗത്തിലെ വിജയിയേക്കാള്‍ മികച്ച സമയവും സ്വന്തമാക്കി. 50,000 രൂപയാണ് ഒന്നാം സമ്മാനം.സമുദ്രനിരപ്പില്‍ നിന്ന് ഏകദേശം 15,000 അടി ഉയരത്തില്‍, മൈനസ് എട്ട് ഡിഗ്രി സെല്‍ഷ്യസ് വരെ താപനില താഴുന്ന അതികഠിനമായ കാലാവസ്ഥയിലായിരുന്നു മത്സരം. കുത്തനെയുള്ള മലകള്‍ കയറിയിറങ്ങുന്ന ദുര്‍ഘടമായ റോഡിലൂടെ നടന്ന മാരത്തണില്‍ ഉത്തരാഖണ്ഡ് സ്വദേശികളും സൈനികരും ഉള്‍പ്പെടെയുള്ളവരെയാണ് തോമസ് പിന്നിലാക്കിയത്. പ്രായം വെറുമൊരു സംഖ്യ മാത്രമാണെന്ന് തെളിയിക്കുന്ന ഈ നേട്ടം കഠിനാധ്വാനത്തിന്റെയും ആത്മവിശ്വാസത്തിന്റെയും വിജയമായി.

ഒക്ടോബര്‍ 18ന് നടന്ന വേദാന്ത ഡല്‍ഹി ഹാഫ് മാരത്തണില്‍ ഒരു മണിക്കൂര്‍ 30 മിനിറ്റ് 53 സെക്കന്‍ഡില്‍ ഓടിയെത്തി പ്രായവിഭാഗത്തില്‍ ഒന്നാം സ്ഥാനം നേടിയ ശേഷമാണ് തോമസ് ഹിമാലയന്‍ ദൗത്യത്തിനായി പുറപ്പെട്ടത്. നേപ്പാള്‍ അതിര്‍ത്തിയോട് ചേര്‍ന്ന ധാര്‍ച്ചുലയില്‍ ഒരു ദിവസം താമസിച്ച് നേപ്പാളിലെ ഗ്രാമങ്ങളിലൂടെ പരിശീലനം നടത്തി. തുടര്‍ന്ന് ആദി കൈലാസിന് സമീപമുള്ള നാബി വില്ലേജിലെ ഹോംസ്‌റ്റേയില്‍ താമസിച്ച് ഹിമാലയന്‍ മലഞ്ചെരുവുകളില്‍ മൂന്ന് ദിവസം കഠിനപരിശീലനവും നടത്തി. ഇതിന് ശേഷമാണ് വെല്ലുവിളികള്‍ നിറഞ്ഞ മത്സരത്തില്‍ പങ്കെടുത്തത്.

തോമസിന്റെ വിജയത്തിനു പിന്നില്‍ വര്‍ഷങ്ങളായുള്ള കഠിനാധ്വാനവും അച്ചടക്കമുള്ള പരിശീലനവുമുണ്ട്. രാവിലെ 7.20ന് ജോലിക്ക് പ്രവേശിക്കേണ്ടതിനാല്‍ പുലര്‍ച്ചെ നാലിന് ഉണര്‍ന്ന് വീടിനടുത്തുള്ള കയറ്റങ്ങള്‍ ഓടിക്കയറിയാണ് പരിശീലനം. പ്രതികൂല കാലാവസ്ഥയും ശരീരവേദനയും വകവെക്കാതെ പരിശീലനം തുടരുന്ന തോമസ് ഹിമാലയത്തിലെ കൊടുംതണുപ്പില്‍ വിരലുകളുടെ നഖങ്ങള്‍ക്കിടയിലൂടെ രക്തം വന്നപ്പോഴും വേദന അവഗണിച്ചാണ് മത്സരം പൂര്‍ത്തിയാക്കിയത്. ലക്ഷ്യത്തോടുള്ള അചഞ്ചലമായ സമര്‍പ്പണമാണ് ഈ വിജയത്തിന് കരുത്തായത്.

തോണിച്ചാല്‍ എമ്മാവുസ് വില്ല സ്‌പെഷ്യല്‍ സ്‌കൂളില്‍ െ്രെഡവറായി ജോലി ചെയ്യുന്ന തോമസ് പള്ളിത്താഴത്ത് ജോലിത്തിരക്കുകള്‍ക്കിടയിലും കായികപരിശീലനത്തിനായി സമയം കണ്ടെത്തുന്നു. കുടുംബത്തിന്റെ പിന്തുണയും കഠിനാധ്വാനവും കൂട്ടിച്ചേര്‍ത്താണ് രാജ്യാന്തര ശ്രദ്ധ നേടുന്ന ഈ നേട്ടത്തിലേക്ക് അദ്ദേഹം എത്തിയത്.

ഭാര്യ ലില്ലി തോമസ്. മക്കളായ അശ്വതി കല്‍പ്പറ്റ ജില്ലാ ചൈല്‍ഡ് പ്രൊട്ടക്ഷന്‍ ഓഫീസില്‍ ജോലി ചെയ്യുന്നു. അനു തോമസ് ആര്‍ക്കിടെക്ടാണ്.

പ്രായം മുന്നോട്ടുപോകുമ്പോഴും സ്വപ്നങ്ങള്‍ക്ക് അതിരുകളില്ലെന്ന് തെളിയിച്ച തോമസ് പള്ളിത്താഴത്തിന്റെ നേട്ടം വയനാടിന് അഭിമാനമായി മാറുകയാണ്. സാധാരണ ജീവിതത്തിന്റെ തിരക്കുകള്‍ക്കിടയിലും അസാധാരണ ലക്ഷ്യങ്ങള്‍ കൈവരിക്കാമെന്ന സന്ദേശമാണ് ഹിമാലയത്തിന്റെ മഞ്ഞുമലകളില്‍ നേടിയ ഈ സ്വര്‍ണവിജയം പകരുന്നത്.