കല്‍പ്പറ്റ: നെടുമ്പാശ്ശേരി വാഹനാപകടത്തില്‍ കൊല്ലപ്പെട്ട മടക്കിമലയിലെ കെ.വി.ദേവികയുടെയും കര്‍ണാടക സുള്ള്യ സ്വദേശി ഇയാസിന്റെയും കുടുംബാംഗങ്ങളെ സാന്ത്വനിപ്പിച്ച് കൃഷിമന്ത്രി ടി.സിദ്ദീഖ്. അപകടത്തില്‍ കൊല്ലപ്പെട്ട മൂന്നുപേരുടെയും കുടുംബത്തിനൊപ്പം ഏതറ്റം വരെയും സര്‍ക്കാര്‍ ഉണ്ടാകുമെന്ന് കുടുംബാംഗങ്ങള്‍ക്ക് മന്ത്രി ഉറപ്പുനല്‍കി.  പ്രതിക്ക് പരമാവധി ശിക്ഷ വാങ്ങിച്ച് കൊടുക്കാന്‍ സംസ്ഥാന സര്‍ക്കാര്‍ നടപടി സ്വീകരിക്കുമെന്ന് ടി.സിദ്ദീഖ് മാധ്യമങ്ങളോട് പറഞ്ഞു. പണക്കൊഴുപ്പും മദ്യവും ലഹരിയും  മൂന്ന് കുട്ടികളുടെ ജീവനെടുത്ത വേദനാജനകമായ സാഹചര്യമാണിത്. പ്രതിക്ക് പരമാവധി ശിക്ഷ വാങ്ങിച്ചു കൊടുക്കണം എന്ന ഒരൊറ്റ വികാരം മാത്രമാണ് കേരളത്തിലുള്ളത്. ആ വികാരം വിഭജിക്കപ്പെടേണ്ട ഒരു ആവശ്യവും കേരളത്തിലില്ല. കേസില്‍ സ്‌പെഷ്യല്‍ പ്രോസിക്യൂട്ടറെ നിയോഗിക്കണമെന്ന് ദേവികയുടെ കുടുംബം ആവശ്യപ്പെട്ടിട്ടുണ്ടെന്നും അദ്ദേഹം പറഞ്ഞു. 


ഇയാസിന്റെയും ഗോപികയുടെയും കുടുംബത്തിന്റെ ആവശ്യങ്ങളും സര്‍ക്കാര്‍ കേള്‍ക്കുകയും പരിഗണിക്കുകയും ചെയ്യും. മൂന്നുപേരുടെ കേസിലും വെവ്വേറെ സ്‌പെഷ്യല്‍ പ്രോസിക്യൂട്ടര്‍മാരെ നിയമിക്കണമെങ്കില്‍ അക്കാര്യവും സര്‍ക്കാര്‍ ആലോചിക്കും. തനിക്ക് ഏറെ വ്യക്തി ബന്ധമുള്ള കുടുംബമാണ് ദേവികയുടേത്. പഠനമികവിന് തന്റെ കയ്യില്‍ നിന്നും പുരസ്‌കാരം വാങ്ങിയിട്ടുള്ള വിദ്യാര്‍ത്ഥിനിയാണ് കൊല്ലപ്പെട്ട ദേവിക. സഹിക്കാന്‍ പറ്റുന്നതിനുമപ്പുറത്തുള്ള വേദനയാണ് കുടുംബത്തിനും സമൂഹത്തിനുമുള്ളത്. പ്രതിയെ സഹായിക്കുന്ന ആരെങ്കിലും ഉണ്ടെങ്കില്‍ അവര്‍ ഈ സിസ്റ്റത്തില്‍ ഉണ്ടാകില്ല. മരിച്ച മൂന്നുപേരുടെയും കുടുംബത്തിന്റെ വേദനയ്ക്കും പ്രയാസത്തിനും ഒപ്പമാണ് സര്‍ക്കാരുള്ളത്. പ്രതിക്ക് പരമാവധി ശിക്ഷ വാങ്ങി കൊടുക്കുന്നതില്‍ ഒരു വിട്ടുവീഴ്ചയും ഉണ്ടാവില്ലെന്നും കൃഷിവകുപ്പ് മന്ത്രി ടി.സിദ്ദീഖ് പറഞ്ഞു