താളൂർ: നിലഗിരി കോളേജ് ഓഫ് ആർട്സ് ആൻഡ് സയൻസ് (ഓട്ടോണമസ്) പി.ജി സൈക്കോളജി വിഭാഗത്തിന്റെ ആഭിമുഖ്യത്തിൽ അഞ്ചാമത് 'തായ്‌സായ് 2026' ഗ്രാന്റ് സൈക്കോളജി ഫെസ്റ്റ് വിജയകരമായി സംഘടിപ്പിച്ചു. വിവിധ സ്കൂളുകളിൽ നിന്നും കോളേജുകളിൽ നിന്നുമായി 565-ഓളം വിദ്യാർത്ഥികളാണ് ഫെസ്റ്റിൽ പങ്കെടുത്തത്.

മനഃശാസ്ത്ര വിജ്ഞാനവും സർഗ്ഗാത്മകതയും സമന്വയിപ്പിച്ച മേളയിൽ 31 വിദ്യാഭ്യാസ സ്ഥാപനങ്ങളിൽ നിന്നുള്ള വിദ്യാർത്ഥികൾ പങ്കാളികളായി. 18 കോളേജുകളിൽ നിന്നായി 240 കോളേജ് വിദ്യാർത്ഥികളും 13 സ്കൂളുകളിൽ നിന്നായി 325 സ്കൂൾ വിദ്യാർത്ഥികളുമാണ് മാറ്റുരച്ചത്. ആകെ 21 വ്യത്യസ്ത മത്സരങ്ങളാണ് ഫെസ്റ്റിന്റെ ഭാഗമായി നടത്തിയത്. വിദ്യാർത്ഥികളുടെ ചിന്താശേഷിയും മാനസികാരോഗ്യ അവബോധവും വളർത്തുന്നതിനായി ക്വിസ് (PSY-Q), സംവാദം (Colloquium), സ്‌പോട്ട് മൂവി (Prism), സ്ലോഗൻ രചന (Psych-Up), പെയിന്റിംഗ് (Pho-Nia), മൈം (Mimus), ഷോട് ഫിലിം (Kurzfilm), റാപ്പ് സോംഗ് (Psy Rap), സൈക്കോ ഗെയിംസ് (Psy-Maze), ബെസ്റ്റ് സൈക്കോളജിസ്റ്റ് (Psy-Ace), ചിത്രവിവരണം (Pixtempore), ജേണൽ മേക്കിംഗ് (Times Tales) തുടങ്ങി വൈവിധ്യമാർന്ന മത്സരങ്ങൾ അരങ്ങേറി.

ഒക്ടോബർ 10-ലെ ലോക മാനസികാരോഗ്യ ദിനാചരണത്തിന് മുന്നോടിയായാണ് ഈ പരിപാടി സംഘടിപ്പിച്ചത്. ചെറുപ്പക്കാരിൽ മാനസികാരോഗ്യത്തെക്കുറിച്ചുള്ള ശരിയായ അവബോധം സൃഷ്ടിക്കുക, മാനസികാരോഗ്യ വെല്ലുവിള നേരിടുന്നവരോടുള്ള സാമൂഹിക മനോഭാവത്തിൽ മാറ്റം വരുത്തുക എന്നിവയായിരുന്നു മേളയുടെ പ്രധാന ലക്ഷ്യം. ഇതിന്റെ ഭാഗമായി വയനാട് ചെന്നലോട് ലൂയിസ് മൗണ്ട് ഹോസ്പിറ്റലുമായി സഹകരിച്ച് പ്രത്യേക മാനസികാരോഗ്യ അവബോധ പ്രദർശനവും (Mental Health Awareness Exhibition) സംഘടിപ്പിച്ചു.

ആവേശകരമായ മത്സരങ്ങൾക്കൊടുവിൽ സ്കൂൾ വിഭാഗത്തിൽ കാലിഫ് ലൈഫ് സ്കൂളും കോളേജ് വിഭാഗത്തിൽ അങ്ങാടിക്കടവ് ഡോൺ ബോസ്കോ കോളേജും  സമഗ്ര ഓവറോൾ ട്രോഫി സ്വന്തമാക്കി. വിദ്യാർത്ഥികളുടെയും അധ്യാപകരുടെയും സജീവ പങ്കാളിത്തം കൊണ്ട് ശ്രദ്ധേയമായ തായ്‌സായ് 2026-ന്റെ വിജയത്തിനായി സഹകരിച്ച എല്ലാ വിദ്യാഭ്യാസ സ്ഥാപനങ്ങൾക്കും ജഡ്ജുമാർക്കും സന്നദ്ധപ്രവർത്തകർക്കും സംഘാടകർ നന്ദി അറിയിച്ചു. വരുംദിനങ്ങളിലും മാനസികാരോഗ്യ അവബോധം ലക്ഷ്യമിട്ടുള്ള കൂടുതൽ സാമൂഹിക-വിദ്യാഭ്യാസ പരിപാടികൾ സംഘടിപ്പിക്കുമെന്ന് സൈക്കോളജി വിഭാഗം വ്യക്തമാക്കി.