കോഴിക്കോട്: കോഴിക്കോട് ബീച്ചില്‍ നിന്ന് എടുത്ത സ്ട്രീറ്റ് ഫോട്ടോയ്ക്ക് അന്താരാഷ്ട്ര തലത്തില്‍ ഷാനവാസ് എ. കെ. യ്ക്ക് അംഗീകാരം.35 അവാര്‍ഡ് ഇന്റര്‍ നാഷണല്‍ ഫോട്ടോഗ്രഫി അവാര്‍ഡിന്റെ 11-ാമത് വാര്‍ഷിക മത്സരത്തിലാണ് ഷാനവാസ് എടുത്ത ഫോട്ടോ ലോകത്തിലെ മികച്ച100 ഫോട്ടോകളില്‍ ഒന്നായി തെരഞ്ഞെടുക്കപ്പെട്ടത്. ലോകത്തിന്റെ വിവിധ ഭാഗങ്ങളില്‍ നിന്നായി 175 രാജ്യങ്ങളില്‍ നിന്നുള്ള 1,12,600 ഫോട്ടോഗ്രാഫര്‍മാര്‍ 4,61,400ലധികം ഫോട്ടോകള്‍ സമര്‍പ്പിച്ച മത്സരത്തിലാണ് ഈ നേട്ടം.സ്ട്രീറ്റ് ഫോട്ടോഗ്രാഫി വിഭാഗത്തില്‍ മത്സരിച്ച ഷാനവാസിന്റെ  ഫോട്ടോയില്‍ കോഴിക്കോട് ബീച്ചിലെ സായാഹ്നത്തിന്റെ മനോഹരമായ അന്തരീക്ഷവും തെരുവ് ജീവിതവും ഒത് ഇഴുകിചേര്‍ന്നിരുന്നു. വൈദ്യുതി പോയ സമയത്ത് തെരുവു വിളക്കിന്റെ ചാരത്ത് അത്തര്‍ വില്‍ക്കുന്ന തെരുവു കച്ചവടക്കാരന്റെ കാഴ്ച്ച ലൈറ്റിംഗും മൂഡും ഗംഭീരമായി പകര്‍ത്തിയ ഫോട്ടോയാണ് ജൂറിയുടെ ശ്രദ്ധയാകര്‍ഷിച്ചത്. ലോകത്തെ മികച്ച 100 ഫോട്ടോഗ്രാഫര്‍മാര്‍ക്കാണ് ഈ അവാര്‍ഡ് നല്‍കുന്നത്.

'കോഴിക്കോട് ബീച്ച് എനിക്ക് എപ്പോഴും പ്രിയപ്പെട്ട ഫോട്ടോഗ്രാഫി സ്ഥലമാണ്. അവിടുത്തെ സ്വാഭാവിക വെളിച്ചവും ജനങ്ങളുടെ ദൈനംദിന ജീവിതവും പകര്‍ത്താന്‍ ശ്രമിക്കാറുണ്ട്. ഈ അന്താരാഷ്ട്ര അംഗീകാരം എനിക്ക് വലിയ പ്രോത്സാഹനമാണ്.'
35-അവാര്‍ഡ് ലോകപ്രശസ്തമായ ഫോട്ടോഗ്രാഫി മത്സരമാണ്. 2015 മുതല്‍ നടത്തിവരുന്ന ഈ മത്സരത്തില്‍ പങ്കെടുക്കുന്നത് തന്നെ ഫോട്ടോഗ്രാഫര്‍മാര്‍ക്ക് വലിയ നേട്ടമായി കണക്കാക്കപ്പെടുന്നു' എന്ന് ഷാനവാസ് പറഞ്ഞു.
ലോകത്തിലെ ഏറ്റവും ദൈര്‍ഖ്യം കുറഞ്ഞ ഒമ്പത് സെകന്റ് സിനിമ 'എലോണ്‍' സംവിധാനം ചെയ്തതിന് ടാലന്റ് ബുക്ക് ഓഫ് വേള്‍ഡ് റെകോര്‍ഡ് ഷാനവാസ് കരസ്ഥമാക്കിയിട്ടുണ്ട്. 
LK ഇന്റര്‍നാഷണല്‍ ഫിലിം ഫെസ്റ്റിവലില്‍ അടക്കം ചിത്രം പ്രദര്‍ശിപ്പിക്കുകയും നിരവധി പുരസ്‌കാരങ്ങള്‍ ഈ ചിത്രത്തിന് ലഭിക്കുകയും ചെയ്തിട്ടുണ്ട്. സൈക്കോളജിസ്റ്റും മികച്ച പരിശീലകനുമായ ഷാനവാസ് വയനാട് ജില്ലയിലെ വിദ്യാഭ്യാസ സാമൂഹിക സന്നദ്ധ മേഘലകളിലെ സജീവ സാന്നിധ്യമാണ്.