വാര്‍ദ്ധക്യകാല പെന്‍ഷന്‍ 5000 രൂപയാക്കണം: സീനിയര്‍ സിറ്റിസണ്‍സ് കോണ്‍ഗ്രസ്
കല്‍പ്പറ്റ: 60 വയസ്സ് കഴിഞ്ഞ മുഴുവന്‍ ആളുകള്‍ക്കും 5000 രൂപ പെന്‍ഷന്‍ നല്‍കണമെന്ന് സീനിയര്‍ സിറ്റിസണ്‍സ് കോണ്‍ഗ്രസ് വയനാട് ജില്ല കമ്മിറ്റി യോഗം സര്‍ക്കാരിനോട് ആവശ്യപ്പെട്ടു.ആയുഷ്മാന്‍ ഭാരത് പദ്ധതിയില്‍ കേരളം നാളിതുവരെ അംഗമായിട്ടില്ല. അത് മൂലം കേന്ദ്രസര്‍ക്കാര്‍ രാജ്യത്തെ മുതിര്‍ന്ന പൗരന്മാര്‍ക്ക് നല്‍കിവരുന്ന സൗജന്യ ആരോഗ്യ സുരക്ഷ പദ്ധതി കേരളത്തിലെ ജനങ്ങള്‍ക്ക് അപ്രാപ്യമായിരിക്കുകയാണ്. മുതിര്‍ന്ന പൗരന്മാര്‍ക്കെതിരെയുള്ള ബാങ്ക് ജപ്തി നടപടികള്‍ നിര്‍ത്തി വെച്ച് പലിശയും പിഴപ്പലിശയും പൂര്‍ണമായും ഒഴിവാക്കണമെന്നും യോഗം ആവശ്യപ്പെട്ടു.മുന്‍ ഡി. സി സി. പ്രസിഡണ്ട് സി.പി. വര്‍ഗീസ് യോഗം ഉദ്ഘാടനം ചെയ്തു. ജില്ലാ പ്രസിഡന്റ് കെ. വി. പോക്കര്‍ ഹാജി അധ്യക്ഷത വഹിച്ചു. വി.എ. മജീദ്, വി വി നാരായണ വാര്യര്‍, എന്‍. ആര്‍ സോമന്‍ മാസ്റ്റര്‍, ജോര്‍ജ് മുണ്ടക്കല്‍, ഇ വി അബ്രഹാം, കെ ശാന്തകുമാരി, ആര്‍. രാജന്‍, ബേബി കൈനിക്കുടി, വര്‍ഗ്ഗീസ് പടിഞ്ഞാറത്തറ തുടങ്ങിയവര്‍ പ്രസംഗിച്ചു.
