ഗാര്ഹിക പീഡന പരാതികളില് ഉടന് അന്വേഷണം നടത്തണം : ഡിജിപി
ഗാര്ഹിക പീഡന പരാതികളില് ഉടന് അന്വേഷണം നടത്തണമെന്ന് ഡിജിപി അനില്കാന്ത്. പൊലീസ് യോഗത്തിലാണ് ഡി.ജി.പിയുടെ നിര്ദേശം. പട്ടികജാതി പട്ടികവര്ഗ വിഭാഗങ്ങള്, സ്ത്രീകള്, കുട്ടികള് എന്നിവര്ക്കെതിരെയുള്ള അതിക്രമങ്ങള് തടയാന് പ്രത്യേക ജാഗ്രതവേണമെന്നും പോക്സോ കേസുകളില് സമയബന്ധിതമായി അന്വേഷണം പൂര്ത്തിയാക്കണമെന്നും ഡിജിപി കര്ശന നിര്ദേശം നല്കി.
കോടതികള്ക്ക് മുമ്പാകെയുള്ള കേസുകളില് ആവശ്യമായ രേഖകള് സമര്പ്പിക്കാന് ജില്ലാ പൊലീസ് മേധാവിമാരുടെ നേതൃത്വത്തില് നടപടിയെടുക്കണം. വാഹനാപകടങ്ങള് കുറയ്ക്കുന്നതിന് ആവശ്യമായ നടപടി കൈക്കൊള്ളണമെന്നും ഡിജിപി പറഞ്ഞു.രാത്രിയും പൊലീസ് പട്രോളിംഗ് സജീവമാക്കാന് ഡിജിപി അനില് കാന്ത് നിര്ദ്ദേശം നല്കി. ഓണ്ലൈനില് ലഭിക്കുന്ന പരാതികളില് ഫലപ്രദമായ നടപടിയെടുക്കണമെന്നും ഡി.ജി.പി അനില്കാന്ത് അറിയിച്ചു.
എസ്.പിമാര് മുതലുള്ള ഉദ്യോഗസ്ഥര് നേരിട്ട് പൊലീസ് ആസ്ഥാനത്തെത്തി യോഗത്തില് പങ്കെടുത്തു.. കൊവിഡ് വ്യാപനത്തിന് ശേഷം ഇതാദ്യമായാണ് മുഴുവന് ഉന്നത ഉദ്യോഗസ്ഥരെയും നേരിട്ട് വിളിച്ചു ചേര്ത്തുള്ള യോഗം. ആറ്റിങ്ങല് പിങ്ക് പൊലീസിന്റെ പരസ്യ വിചാരണയില് അടക്കം കോടതി പൊലീസിനെ നിശിതമായി വിമര്ശിച്ചിരുന്നു. മാത്രവുമല്ല മോണ്സണ് മാവുങ്കല് വിഷയത്തിലും മോഫിയ പര്വീണിന്റെ ആത്മഹത്യ വിഷയത്തിലുമടക്കം പൊലീസിന് സംഭവിച്ച വീഴ്ചകള് യോഗത്തില് വിശദമായി ചര്ച്ച ചെയ്തു.
കമന്റ് ബോക്സില് വരുന്ന അഭിപ്രായങ്ങള് ഓപ്പൺന്യൂസറിന്റെത് അല്ല. മാന്യമായ ഭാഷയില് വിയോജിക്കാനും തെറ്റുകള് ചൂണ്ടി കാട്ടാനും അനുവദിക്കുമ്പോഴും മനഃപൂര്വ്വം അധിക്ഷേപിക്കാന് ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്