നിര്‍ഭയം കുട്ടികളുടെ ചോദ്യങ്ങള്‍ ;ഉത്തരങ്ങളുമായി ജില്ലാ പോലീസ് മേധാവി
കല്‍പ്പറ്റ:ശിശു സംരക്ഷണ വകുപ്പിന്റെ ടേക്ക് ഓഫ് സംവാദ പരിപാടിയില്‍ ജില്ലാ പോലീസ് മേധാവി ആര്‍ ഇളങ്കോയോട് ചോദ്യങ്ങളും സംശയങ്ങളുമായി കുട്ടികള്‍ എത്തി. കോവിഡ് കാലത്ത് വീട്ടിലിരുന്ന് മടുത്തുവെന്നും കൂട്ടുകാരെ കാണാന്‍ ആഗ്രഹമുണ്ട് എന്നതൊക്കെയായിരുന്നു എസ് പി യോട് കുട്ടികളുടെ പരിഭവങ്ങള്‍. കുറച്ചു കൂടി ക്ഷമിക്കൂ ഇളവുകള്‍ വരും ആര്‍ ഇളങ്കോ സമാധാനിപ്പിച്ചു. വീട്ടിലിരിക്കുന്ന സമയം പാഴാക്കാതെ യൂട്യൂബില്‍ മറ്റും വിവര വിനിമയ മാധ്യമങ്ങളിലൂടെ അവരവരുടെ അഭിരുചിക്ക് അനുസരിച്ച്അറിവുകള്‍ നേടാനും ഉപദേശം നല്‍കി.പാഠ പുസ്തക അറിവുകള്‍ക്കപ്പുറം നമുക്ക് ചുറ്റും അനന്തമായിട്ടുള്ള ലോകമുണ്ട്. ദിനപത്രങ്ങള്‍, ആനുകാലികങ്ങള്‍ എന്നിവയില്‍ നിന്നെല്ലാം വിവരങ്ങള്‍ ശേഖരിക്കാന്‍ കഴിയും. വിവര വിനിമയ സാങ്കേതികതയുടെ കാലത്ത് അറിവാണ് പ്രധാനമെന്നും കുട്ടികളോട് സംവദിച്ചു.അങ്ങയെ പോലെ ഐ പി എസ് ആകണമെന്ന ചോദ്യത്തിന് കടന്നു വന്ന വഴികളെ കുറിച്ചും കഷ്ടപ്പാടുകളെ കുറിച്ചും ജില്ലാ പോലീസ് മേധാവി പറഞ്ഞു. തിരക്കുകള്‍ക്കിടയിലും ടേക്ക് ഓഫ് സംവാദ പരിപാടിയില്‍ നിരവധി വിദ്യാര്‍ത്ഥികളുമായി അദ്ദേഹം സംവദിച്ചു. ജില്ലാ പോലീസ് മേധാവിയുടെ കാര്യാലയത്തില്‍ നടന്ന ചടങ്ങില്‍ ജില്ലാ ശിശു സംരക്ഷണ ഓഫീസര്‍ ടി. യു സ്മിത തുടങ്ങിയവര്‍ സന്നിഹിതരായിരുന്നു.
