നെല്‍വിത്തുകളുടെ കാവല്‍ക്കാരന്‍ പത്മശ്രീ ചെറുവയല്‍ രാമന്‍ വിടവാങ്ങി
മാനന്തവാടി:വയനാട്ടിലെ പാരമ്പര്യ നെല്‍വിത്തുകളുടെ സംരക്ഷകനും പത്മശ്രീ പുരസ്‌കാര ജേതാവുമായ കര്‍ഷകന്‍ ചെറുവയല്‍ രാമന്‍ (75) അന്തരിച്ചു. കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയായിരുന്നു അന്ത്യം. 1952 ജൂണ്‍ ആറിന് ജനിച്ച തലക്കര ചെറിയ രാമന്‍ എന്ന ചെറുവയല്‍ രാമന്‍, കമ്മന നവോദയ എല്‍.പി സ്‌കൂളിലെ പ്രാഥമിക വിദ്യാഭ്യാസത്തിന് ശേഷം തന്റെ പത്താമത്തെ വയസ്സിലാണ് കാര്‍ഷിക മേഖലയിലേക്ക് പൂര്‍ണ്ണമായും കടന്നുവരുന്നത്. 1969ല്‍ കണ്ണൂര്‍ ഡി.എം.ഒ ഓഫീസില്‍ ലഭിച്ച സര്‍ക്കാര്‍ ജോലി പോലും കൃഷിയോടുള്ള അഭിനിവേശം കാരണം അദ്ദേഹം വേണ്ടെന്നുവെക്കുകയായിരുന്നു. 45ലേറെ വരുന്ന തദ്ദേശീയ നെല്‍വിത്തിനങ്ങളെ വംശനാശത്തില്‍ നിന്ന് സംരക്ഷിച്ച് നിലനിര്‍ത്തിയതിലൂടെയാണ് കുറിച്യ സമുദായത്തില്‍പ്പെട്ട അദ്ദേഹം രാജ്യത്തിന്റെ ശ്രദ്ധ പിടിച്ചുപറ്റിയത്.
മാനന്തവാടി കമ്മന സ്വദേശിയായ അദ്ദേഹം പതിറ്റാണ്ടുകളായി പൂര്‍ണ്ണമായും ജൈവരീതിയിലാണ് കൃഷി ചെയ്തിരുന്നത്. നെല്‍വിത്തുകള്‍ക്ക് പുറമെ പാരമ്പര്യ പച്ചക്കറികള്‍, ഔഷധ സസ്യങ്ങള്‍, വിവിധ വൃക്ഷങ്ങള്‍ എന്നിവയും അദ്ദേഹം തന്റെ തോട്ടത്തില്‍ സംരക്ഷിച്ചുപോന്നു. വിളവെടുത്ത നെല്ല് ഒരാഴ്ച വെയിലും മഞ്ഞും കൊള്ളിച്ച ശേഷം ചൂടാക്കിയ മുളങ്കൂട്ടയിലും വൈക്കോല്‍ കൊണ്ടുണ്ടാക്കിയ വിത്തുകൂടയിലും സൂക്ഷിക്കുന്ന പാരമ്പര്യ രീതിയാണ് അദ്ദേഹം പിന്തുടര്‍ന്നത്. ഇങ്ങനെ സൂക്ഷിക്കുന്ന വിത്തുകള്‍ക്ക് രണ്ടു വര്‍ഷം വരെ മുളയ്ക്കല്‍ ശേഷി നഷ്ടപ്പെടില്ല. വിത്ത് ചോദിച്ച് എത്തുന്നവര്‍ക്ക് പകരമായി അടുത്ത കൃഷിക്കാലത്ത് പണത്തിന് പകരം വിത്തുകള്‍ തന്നെ തിരികെ നല്‍കണമെന്ന നിബന്ധനയോടെയായിരുന്നു അദ്ദേഹം വിതരണം ചെയ്തിരുന്നത്.
2011ല്‍ ഹൈദരാബാദില്‍ നടന്ന പതിനൊന്ന് രാജ്യങ്ങളുടെ ജൈവവൈവിധ്യ സംരക്ഷണ സമ്മേളനത്തില്‍ കേരളത്തിലെ കര്‍ഷകരെ പ്രതിനിധീകരിച്ചത് അദ്ദേഹമായിരുന്നു. രാസവളങ്ങളോ ആധുനിക യന്ത്രങ്ങളോ ഉപയോഗിക്കാതെ പ്രകൃതിയോടിണങ്ങിയുള്ള അദ്ദേഹത്തിന്റെ കാര്‍ഷിക രീതിയും അര്‍പ്പണബോധവും പരിഗണിച്ച് 2023ലാണ് രാജ്യം പത്മശ്രീ നല്‍കി ആദരിച്ചത്. കേന്ദ്ര കൃഷി വകുപ്പിന്റെ 2016ലെ ദേശീയ പ്ലാന്റ് ജീനോം സേവിയര്‍ അവാര്‍ഡ് ഉള്‍പ്പെടെ നിരവധി അംഗീകാരങ്ങള്‍ അദ്ദേഹത്തെ തേടിയെത്തിയിട്ടുണ്ട്. ഒരു ആയുസ്സ് മുഴുവന്‍ കാര്‍ഷിക പൈതൃക സംരക്ഷണത്തിനായി മാറ്റിവെച്ച വലിയൊരു കര്‍ഷകനെയാണ് അദ്ദേഹത്തിന്റെ വിയോഗത്തിലൂടെ നഷ്ടമായിരിക്കുന്നത്. വാര്‍ത്താ ആവശ്യങ്ങള്‍ക്കായി ഉപയോഗിക്കാവുന്ന രീതിയിലാണ് വിവരങ്ങള്‍ ക്രോഡീകരിച്ചിട്ടുള്ളത്.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍