സ്വതന്ത്രസോഫ്റ്റ്വെയര് ഇന്സ്റ്റാള് ഫെസ്റ്റ്: രജിസ്ട്രേഷന് തുടങ്ങി
സോഫ്റ്റ്വെയര് സ്വാതന്ത്ര്യദിനാചരണവുമായി ബന്ധപ്പെട്ട് കേരളാ ഇന്ഫ്രാസ്ട്രക്ചര് ആന്റ് ടെക്നോളജി ഫോര് എഡ്യൂക്കേഷന്(കൈറ്റ്)ന്റെ നേതൃത്വത്തില് പൊതുജനങ്ങള്ക്കും വിദ്യാര്ഥികള്ക്കും ഉദ്യോഗസ്ഥര്ക്കുമായി വയനാട് ഐ.ടി.@സ്കൂള് ജില്ലാ റിസോഴ്സ് കേന്ദ്രത്തില് നടത്തുന്ന സ്വതന്ത്രസോഫ്റ്റ്വെയര് ഇന്സ്റ്റാള് ഫെസ്റ്റിനുള്ള രജിസ്ട്രേഷന് ആരംഭിച്ചു.
ഇന്സ്റ്റാള് ഫെസ്റ്റ് ഒക്ടോബര് 2 ന് രാവിലെ 9.30 മുതല് ആരംഭിക്കും. ഇതില് എത്തിക്കുന്ന കമ്പ്യൂട്ടറുകളില് ഐ.ടി@സ്കൂള് ലിനക്സ്/സ്വതന്ത്ര സോഫ്റ്റ് വെയറുകള് സൗജന്യമായി ഇന്സ്റ്റാള് ചെയ്തു നല്കും. പങ്കെടുക്കാനാഗ്രഹിക്കുന്നവര് അന്നേദിവസം രാവിലെ 11.30 ന് മുമ്പായി കമ്പ്യൂട്ടറുകള് പനമരത്ത് ഐടി@സ്ക്കൂള് ജില്ലാ റിസോഴ്സ് സെന്ററില് എത്തിക്കണം. പങ്കെടുക്കുന്നവര്ക്ക് സ്വതന്ത്ര സോഫ്റ്റ് വെയര് ഇന്സ്റ്റലേഷന് പ്രവര്ത്തനങ്ങള് പരിചയിക്കാനുള്ള സൗകര്യവും ഉണ്ടായിരിക്കും.
വിദ്യാര്ത്ഥികള്ക്കും പൊതുജനങ്ങള്ക്കും, ഉദ്യോഗസ്ഥരുടെ ഓഫീസ് ആവശ്യങ്ങള്ക്കും ഉപയോഗപ്രദമായ ഓഫീസ് പാക്കേജുകള്, മള്ട്ടിമീഡിയാ സോഫ്റ്റ്വെയറുകള്, ഗ്രാഫിക്സ്, വീഡിയോ ഓഡിയോ എഡിറ്റിങ്ങ്, അനിമേഷന് സോഫ്റ്റ്വെയറുകള്, പഠനാവശ്യത്തിനുള്ള ഇന്ഫോടെയിന്മെന്റ് ഗെയിമുകള്, വിദ്യാഭ്യാസ സോഫ്റ്റ്വെയറുകള് പ്രോഗ്രാമിങ് ടൂളുകള് തുടങ്ങിയവ ഉള്ക്കൊള്ളുന്ന ഐ.ടി@സ്കൂള് ഗ്നു/ലിനക്സ് സഞ്ചയമാണ് ലഭ്യമാക്കുന്നത്. ഉടമസ്ഥാവകാശമുള്ള സോഫ്റ്റ്വെയറുകളുടെ വിലയുമായി താരതമ്യം ചെയ്താല് ഏകദേശം ഒന്നര ലക്ഷം രൂപ വിലമതിക്കുന്ന പാക്കേജുകള് ഇതില് ഉള്പ്പെട്ടിട്ടുണ്ട്.
ചടങ്ങിനോടനുബന്ധിച്ച് സോഫ്റ്റ്വെയര്, സംബന്ധമായ വിദഗ്ധരുടെ ക്ളാസുകളും ഗ്നു/ലിനക്സ് സംശയ നിവാരണ സെഷനും ഉണ്ടായിരിക്കും. ജില്ലയിലെ തിരഞ്ഞെടുത്ത വിദ്യാലയങ്ങളിലെ ഹായ്സ്കൂള് കുട്ടിക്കൂട്ടം അംഗങ്ങള്ക്ക് ഇന്സ്റ്റലേഷന് പരിശീലനവും നല്കുന്നതാണ്.
വീട്, വിദ്യാഭ്യാസം, വാണിജ്യം, ഭരണനിര്വഹണം തുടങ്ങി എല്ലാ മേഖലകളിലും സ്വതന്ത്ര സേഫ്റ്റ്വെയര് ഉപയോഗിക്കുന്നതിന്റെ ഗുണഫലങ്ങളെപ്പറ്റി ജനങ്ങളെ ബോധവല്ക്കരിക്കുകയാണ് സോഫറ്റ്വെയര് സ്വതന്ത്ര്യദിനാചരണത്തിന്റെ ലക്ഷ്യം. വിദ്യാലയങ്ങളിലും സര്ക്കാര് ഓഫീസുകളിലും സ്വതന്ത്രസോഫ്റ്റ്വെയര് ഉപയോഗം ഉറപ്പുവരുത്തണമെന്ന് സംസ്ഥാന സര്ക്കാര് നിഷ്കര്ഷിച്ചിട്ടുണ്ട്.
ജില്ലാതല പരിപാടിയുടെ തുടര്ച്ചയായി ആദ്യം എല്ലാ സബ് ജില്ലകളിലും പിന്നീട് മുഴുവന് സ്കൂളുകള് കേന്ദ്രീകരിച്ചും ഇന്സ്റ്റാള് ഫെസ്റ്റ് നടത്തും. പങ്കെടുക്കാനാഗ്രഹിക്കുന്നവര് സെപ്റ്റംബര് 26 നകം www.itschool.gov.inല് ഓണ്ലൈനായി രജിസ്റ്റര് ചെയ്യേണ്ടതാണെന്ന് ഐ.ടി.@സ്കൂള് ജില്ലാകോര്ഡിനേറ്റര് വി ജെ തോമസ് അറിയിച്ചു.