കല്‍പ്പറ്റ: എസ്എഫ്‌ഐ ക്രിമിനലുകളെ എന്തുവില കൊടുത്തും സംരക്ഷിക്കുമെന്ന സിപിഎം പ്രഖ്യാപനം രാഹുല്‍ഗാന്ധി എം പിയുടെ ഓഫീസിന് നേരെയുണ്ടായ ആക്രമണം സിപിഎം നേതൃത്വത്തിന്റെ പങ്കാളിത്തത്തോടെയാണെന്നതിന്റെ തെളിവാണെന്ന് കെപിസിസി വര്‍ക്കിംഗ് പ്രസിഡന്റ് അഡ്വ.ടി സിദ്ദിഖ് എംഎല്‍എ. എംഎല്‍എ എന്ന രീതിയില്‍ പ്രവര്‍ത്തിക്കുന്നതിന് ബുദ്ധിമുട്ടുണ്ടാകുമെന്നും, കൈകാര്യം ചെയ്യുമെന്നുമുള്ള സിപിഎം നേതാക്കളുടെ പ്രഖ്യാപനത്തെ അര്‍ഹിക്കുന്ന അവജ്ഞയോടെ തള്ളിക്കളയുകയാണെന്നും എംഎല്‍എയുടെ നേതൃത്വത്തില്‍ ഗുണ്ടകള്‍ ആക്രമണം നടത്തിയെന്ന് സിപിഎം പറയുന്നത് സ്വന്തം ചെയ്തികള്‍ മറച്ചുവെക്കുന്നതിനാണെന്നും അഡ്വ.ടി.സിദ്ദിഖ് എംഎല്‍എ ആരോപിച്ചു.

എം പി ഓഫീസ് ആക്രമിച്ചതും വ്യാപകമായ നാശനഷ്ടങ്ങള്‍ വരുത്തിയതിനുമെതിരെ വലിയ വികാരം പൊതുസമൂഹത്തിന്റെ ഭാഗത്ത് നിന്നും ഉണ്ടായിരിക്കുകയാണ്. ഇത്തരം വ്യാജപ്രസ്താവനക്ക് പിന്നില്‍ സി പി എമ്മിമേറ്റ ഈ വലിയ ക്ഷീണമാണ്. ഗുണ്ടകളെ കൊണ്ടുനടക്കലും, ആയുധങ്ങള്‍ സൂക്ഷിക്കലും, ഓഫീസുകളില്‍ ബോംബും, വടിവാളും സൂക്ഷിക്കലുമെല്ലാം സി പി എമ്മിന്റെ തൊഴിലാണ്. ഞങ്ങളുടെ രീതിയല്ല, സി പി എമ്മിന്റെ പ്രകടനത്തിനിടെ കോണ്‍ഗ്രസിന്റെയും മുസ്ലീംലീഗിന്റെയും കൊടിതോരണങ്ങള്‍ നശിപ്പിച്ചത് എസ് എഫ് ഐ തുടങ്ങിവെച്ച ആക്രമണം സി പി എം തുടരുമെന്നുള്ളതിന്റെ ആഹ്വാനമാണ്. കല്‍പ്പറ്റയുടെ സമാധാന അന്തരീക്ഷം തകര്‍ക്കാന്‍ സി പി എം നേതൃത്വം നടത്തുന്ന ആസൂത്രിതമായ നീക്കത്തിനെതിരെ സമാധാനകാംക്ഷികളായ ജനങ്ങളെ അണിനിരത്തി പ്രതിരോധിക്കും. എം എല്‍ എക്കെതിരെ ഇന്നത്തെ പൊതുപരിപാടിയില്‍ നടത്തിയ ആക്രമണോത്സുക ആഹ്വാനവും പ്രസംഗങ്ങള്‍ക്കും ഒരു വിലയും കല്‍പ്പിക്കുന്നില്ല. ജനങ്ങളുടെ കൂടെ നിന്ന് നാടിന്റെ വികസനപ്രവര്‍ത്തനങ്ങള്‍ക്ക് വര്‍ധിത വീര്യത്തോടെ നേതൃത്വം നല്‍കും. സി പി എമ്മിന്റെ ഭീഷണിക്ക് മുമ്പില്‍ മുട്ടുമടക്കില്ലെന്നും അദ്ദേഹം പറഞ്ഞു.