ഓപ്പറേഷന് തൂഫാന്; ഒരു മാസത്തിനുള്ളില് വയനാട്ടില് 135 കേസുകള്; 148 പേര് പിടിയില്
കല്പ്പറ്റ: ലഹരിക്കെതിരെയുള്ള കേരളാ പോലീസിന്റെ ഓപ്പറേഷന് തൂഫാന് ദി നാര്ക്കോ ഹണ്ടിന്റെ ഭാഗമായി വയനാട് ജില്ലയില് ഒരു മാസത്തിനുള്ളില് വിവിധ സ്റ്റേഷനുകളിലായി 135 കേസുകള് രജിസ്റ്റര് ചെയ്തു. 148 പേരെ പിടികൂടി. 110.267 ഗ്രാം എം.ഡി.എം.എയും, എട്ട് കിലോ ഗ്രാമോളം കഞ്ചാവും, 7.7 ഗ്രാം ഹാഷിഷ് ഓയിലും, 101 കഞ്ചാവ് നിറച്ച സിഗരറ്റുകളും പിടിച്ചെടുത്തു. ഇതിനു പുറമെ നിരോധിത പുകയില ഉല്പ്പന്നങ്ങളുമായി(COTPA) ബന്ധപ്പെട്ട് 66 പേരെ പിടികൂടിയിട്ടുണ്ട്. മാനന്തവാടിയിലും തിരുനെല്ലിയിലും കഞ്ചാവ് ചെടികളും കണ്ടെടുത്തു. ജൂണ് ഒന്ന് മുതല് 30-ാം തീയതി വരെയുള്ള കണക്കാണിത്.
ലഹരിക്കടത്ത്, വില്പ്പന, ഉപയോഗം എന്നിവ തടയുന്നതിനായി എല്ലാ സ്റ്റേഷന് പരിധികളിലും ജില്ലാ അതിര്ത്തികളിലും പ്രത്യേക പരിശോധന നടത്തിവരുന്നുണ്ട്. കൂടാതെ ലഹരിക്കേസിലുള്പ്പെടുന്നവരുടെ സ്വത്ത് കണ്ടുകെട്ടുന്നതടക്കമുള്ള ശക്തമായ നിയമനടപടികളും പോലീസ് സ്വീകരിക്കും. പ്രത്യേക പരിശീലനം ലഭിച്ച നാര്ക്കോട്ടിക് സ്നിഫര് ഡോഗുമായി പോലീസ് ഡോഗ് സ്ക്വാഡും, പോലീസ് ഡ്രോണും പരിശോധനയില് സജീവമാണ്. സമൂഹത്തില് ലഹരി ഇല്ലായ്മ ചെയ്യുന്നതിനായി ഓപ്പറേഷന് തൂഫാനില് പൊതുജനങ്ങളുടെ പങ്കാളിത്തവും ശ്രദ്ധേയമാണ്. ലഹരി ഉപയോഗത്തെയും വിപണനത്തെയും കുറിച്ചുള്ള വിവരങ്ങള് പൊതുജനങ്ങള് പോലീസിന് പങ്കുവെക്കുന്നുണ്ട്. ലഭിച്ച വിവരങ്ങളുടെ അടിസ്ഥാനത്തില് പോലീസ് പരിശോധന നടത്തുകയും നടപടികള് സ്വീകരിക്കുകയും ചെയ്യുന്നുണ്ട്.
നിങ്ങളും 'തൂഫാന് പോരാളി'യാകുക
ലഹരി ഉപയോഗമോ വിപണനമോ ശ്രദ്ധയില്പെട്ടാല്
വിവരം ഉടന് തന്നെ പോലീസിനെ അറിയിക്കുക
വിവരം നല്കുന്നവരുടെ പേര് വിവരങ്ങള് രഹസ്യമായിരിക്കും.
(വാട്സ്ആപ്പ് നമ്പര്)
9995966666
(വിളിച്ച് അറിയിക്കാം )
9497979794
9497927797
കമന്റ് ബോക്സില് വരുന്ന അഭിപ്രായങ്ങള് ഓപ്പൺന്യൂസറിന്റെത് അല്ല. മാന്യമായ ഭാഷയില് വിയോജിക്കാനും തെറ്റുകള് ചൂണ്ടി കാട്ടാനും അനുവദിക്കുമ്പോഴും മനഃപൂര്വ്വം അധിക്ഷേപിക്കാന് ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്