കെല്ലൂരിലെ റേഷന്‍ കരിഞ്ചന്ത;സിവില്‍ സപ്ലൈസ് -പോലീസ് വിജിലന്‍സ് വിഭാഗങ്ങള്‍ അന്വേഷണം തുടങ്ങി
മാനന്തവാടി:കെല്ലൂരിലെ റേഷന്‍ കരിഞ്ചന്തയുമായി ബന്ധപ്പെട്ട് സിവില്‍ സപ്ലൈസ് വകുപ്പും പോലീസ് വിജിലന്‍സും അന്വേഷണം ആരംഭിച്ചു. ഇതിന്റെ ഭാഗമായി കെല്ലൂര്‍ മൊക്കത്തുള്ള സപ്ലൈക്കോ ഗോഡൗണില്‍ സ്‌റ്റോക്ക് പരിശോധന തുടങ്ങി.സിവില്‍ സപ്ലൈ ഉദ്യോഗസ്ഥരുടെ നേതൃത്വത്തിലുള്ള പരിശോധന നാട്ടുകാര്‍ അനുവദിക്കാത്തതിനെ തുടര്‍ന്ന് മാനന്തവാടി തഹസില്‍ദാരുടെ നേതൃത്വത്തിലാണ് സ്‌റ്റോക്ക് പരിശോധിക്കുന്നത്.കെല്ലൂരില്‍ നിര്‍മാണത്തിലിരിക്കുന്ന റേഷന്‍കടയുടമയുടെ വീട്ടില്‍ നിന്നും ഇന്നലെ 8 ടണ്‍ റേഷനരി പിടികൂടിയതുമായി ബന്ധപ്പെട്ട് സിവില്‍ സപ്ലൈസ് വകുപ്പും പോലീസ് വിജിലന്‍സ് വിഭാഗവുമാണ് അന്വേഷണം ആരംഭിച്ചത്. ഇതുമായി ബന്ധപ്പെട്ട് മാനന്തവാടി താലൂക്കിലെ 35,40 നമ്പര്‍ റേഷന്‍കടകളില്‍ ഇന്നലെ പരിശോധന നടത്തിയിരുന്നു.ഈ രണ്ട് കടകളുടെയും ലൈസന്‍സ് റദ്ദ്‌ചെയ്യുമെന്നാണ് സൂചന.ഇന്ന് രാവിലെ സപ്ലൈക്കോയുടെ മൊക്കത്തെ ഗോഡൗണില്‍ പരിശോധനക്കെത്തിയ സിവില്‍ സപ്ലൈസ് ഉദ്യോഗസ്ഥരെ നാട്ടുകാരും യുവജനസംഘടനകളും ചേര്‍ന്ന് തടഞ്ഞു.റേഷന്‍കരിഞ്ചന്തയില്‍ ഉദ്യോഗസ്ഥര്‍ക്ക് പങ്കുണ്ടെന്നും റവന്യു ഉദ്യോഗസ്ഥരുടെ സാന്നിദ്ധ്യത്തില്‍ മാത്രമെ കണക്കെടുപ്പ് അനുവദിക്കുകയുള്ളുവെന്നും വ്യക്തമാക്കിയായിരുന്നു പ്രതിഷേധം.
തുടര്‍ന്ന് മാനന്തവാടി തഹസില്‍ ദാര്‍ സ്ഥലത്തെത്തിയ ശേഷമാണ് തഹസില്‍ദാരുടെ നേതൃത്വത്തില്‍ പരിശോധന ആരംഭിച്ചത്.നാളെയോടെ മാത്രമെ പരിശോധനകള്‍ പൂര്‍ത്തിയാവുകയുള്ളു. ഇതിനിടെ നാട്ടുകാര്‍ നല്‍കിയ പരാതിയെ തുടര്‍ന്ന് പോലീസ് വിജിലന്‍സ് വിഭാഗവും അന്വേഷണം നടത്തുന്നണ്ട്.വിജിലന്‍സ് സി ഐ ശശിധരന്‍ പരാതിക്കാരില്‍ നിന്നും സിവില്‍ സപ്ലൈഉദ്യോഗസ്ഥരില്‍ നിന്നും വിവരങ്ങള്‍ ശേഖരിച്ചു.ഇന്നലെ രാവിലെയാണ് 8 ടണ്‍ റേഷനരി നാട്ടുകാര്‍ പിന്തുടര്‍ന്ന് പിടികൂടിയത്.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍