തലനാരിഴയ്ക്ക് രക്ഷപ്പെടല്! മൂര്ഖന് വീട്ടമ്മയെ കടിച്ചു; വസ്ത്രത്തില് മാത്രം കടിയേറ്റതിനാല് ഒഴിവായത് വലിയ ദുരന്തം
തലപ്പുഴ: തലപ്പുഴ മക്കിമലയില് വീട്ടമ്മയ്ക്ക് നേരെ മൂര്ഖന് പാമ്പിന്റെ ആക്രമണം. വസ്ത്രത്തില് കടിയേറ്റതിനാല് മാത്രം മക്കിമല സ്വദേശിനി ഉഷ അത്ഭുതകരമായി രക്ഷപ്പെട്ടു. ഇന്നലെ വൈകുന്നേരമാണ് നാടിനെ ഞെട്ടിച്ച സംഭവമുണ്ടായത്. വിറക് പുരയില് വിറക് എടുക്കാന് എത്തിയപ്പോഴായിരുന്നു സംഭവം.വീട്ടിലെ കോഴിമുട്ടകളുടെ എണ്ണത്തില് കുറവ് വരുന്നത് ഉഷയുടെ ശ്രദ്ധയില്പ്പെട്ടിരുന്നു. വീട്ടാവശ്യത്തിന് ആരെങ്കിലും എടുത്തതാകാമെന്ന് കരുതി അവര് ഇത് കാര്യമാക്കിയില്ല. എന്നാല് വിറക് പുരയുടെ വശത്ത് കോഴികള്ക്ക് മുട്ടയിടാനായി കെട്ടിവച്ചിരുന്ന കൊട്ടയ്ക്കുള്ളില് നിന്നും മുട്ടകള് മോഷ്ടിച്ചിരുന്നത് ഉഗ്രന് മൂര്ഖന് പാമ്പായിരുന്നു. വിറക് പുരയ്ക്ക് സമീപത്തുകൂടെ നടന്നുപോവുകയായിരുന്ന ഉഷയുടെ നേര്ക്ക് മൂര്ഖന് പാമ്പ് ആഞ്ഞടുക്കുകയായിരുന്നു. ഉഷയെ ആഞ്ഞു കടിച്ചെങ്കിലും ഭാഗ്യവശാല് പാമ്പിന്റെ പല്ലുകള് ഉഷയുടെ വസ്ത്രത്തില് മാത്രമാണ് തറച്ചത്. പിടിവിട്ട പാമ്പ് ഉടന് തന്നെ സമീപത്തെ വിറക് കൂനയ്ക്കുള്ളിലേക്ക് ഇഴഞ്ഞു കയറി.
ഉടന് തന്നെ വീട്ടുകാര് തലപ്പുഴ ഫോറസ്റ്റ് ഓഫീസില് വിവരമറിയിച്ചു. വനം വകുപ്പിന്റെ റെസ്ക്യുവര് സുജിത്ത് വയനാട് സ്ഥലത്തെത്തി. വീട്ടുകാരുടെ സഹായത്തോടെ വിറകുകള് ഓരോന്നായി മാറ്റി നടത്തിയ തിരച്ചിലിനൊടുവില് കൂറ്റന് മൂര്ഖനെ സുജിത്ത് സാഹസികമായി പിടികൂടി.പിടികൂടിയ പാമ്പിനെ വനപാലകര് പിന്നീട് ഉള്വനത്തില് തുറന്നുവിട്ടു. തലനാരിഴയ്ക്ക് ജീവന് തിരിച്ചുകിട്ടിയ ആശ്വാസത്തിലാണ് ഉഷയും കുടുംബവും.
കമന്റ് ബോക്സില് വരുന്ന അഭിപ്രായങ്ങള് ഓപ്പൺന്യൂസറിന്റെത് അല്ല. മാന്യമായ ഭാഷയില് വിയോജിക്കാനും തെറ്റുകള് ചൂണ്ടി കാട്ടാനും അനുവദിക്കുമ്പോഴും മനഃപൂര്വ്വം അധിക്ഷേപിക്കാന് ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്