വയനാട് ഗവ.മെഡിക്കല്‍ കോളേജില്‍ ഒന്നാം വര്‍ഷ എം.ബി.ബി.എസ് ക്ലാസുകള്‍ക്ക് തുടക്കമായി
മാനന്തവാടി: വയനാട് ഗവ. മെഡിക്കല്‍ കോളജില്‍ ഒന്നാം വര്‍ഷ എം.ബി.ബി.എസ് ക്ലാസുകള്‍ ആരംഭിച്ചു. പ്രഥമ മെഡിസിന്‍ ബാച്ചില്‍ 41 വിദ്യാര്‍ത്ഥികളാണ് ഇതുവരെ അഡ്മിഷന്‍ എടുത്തത്. ഒക്ടോബര്‍ മൂന്നിന് ഓണ്‍ലൈനായി ക്ലാസുകള്‍ തുടങ്ങിയിരുന്നു. ദേശീയ മെഡിക്കല്‍ കമ്മീഷന്റെയും കേരള ആരോഗ്യ സര്‍വകലാശാലയുടെയും നിര്‍ദ്ദേശപ്രകാരം വിദ്യാര്‍ത്ഥികള്‍ക്ക് ഒക്ടോബര്‍ 14 വരെ ഫൗണ്ടേഷന്‍ കോഴ്‌സ് നല്‍കും. വിദ്യാര്‍ത്ഥികളെ മെഡിക്കല്‍ പാഠ്യപദ്ധതിയെയും ആരോഗ്യ പരിപാലന സംവിധാനത്തെയും കുറിച്ച് ബോധവാന്മാരാക്കാന്‍ ലക്ഷ്യമിട്ടാണ് ഇപ്പോള്‍ ആരംഭിച്ച ഫൗണ്ടേഷന്‍ കോഴ്‌സ്. ഫൗണ്ടേഷന്‍ കോഴ്‌സിന് ശേഷം തിയറി, പ്രാക്ടിക്കല്‍ ക്ലാസുകള്‍ തുടങ്ങും. 17 ആണ്‍കുട്ടികളും 21 പെണ്‍കുട്ടികളുമാണ് ആദ്യ ദിനം കോളജിലെത്തിയത്. വിദ്യാര്‍ത്ഥികള്‍ക്കൊപ്പമെത്തിയ രക്ഷിതാകള്‍ക്കും പ്രത്യേക ഓറിയന്റേഷന്‍ ക്ലാസുകള്‍ സംഘടിപ്പിച്ചിരുന്നു.
വയനാട് മെഡിക്കല്‍ കോളേജില്‍ 50 എംബിബിഎസ് സീറ്റുകള്‍ക്കാണ് ഈ വര്‍ഷം നാഷണല്‍ മെഡിക്കല്‍ മിഷന്റെ അനുമതി ലഭിച്ചത്. ഇതില്‍ ഏഴെണ്ണം അഖിലേന്ത്യാ ക്വാട്ടയില്‍ നിന്നുള്ള വിദ്യാര്‍ത്ഥികള്‍ക്കായി മാറ്റിവെച്ചിട്ടുണ്ട്. ബാക്കി സീറ്റുകള്‍ സംസ്ഥാനത്തു നിന്നുള്ള വിദ്യാര്‍ത്ഥികള്‍ക്കാണ്. പ്രവേശന നടപടികള്‍ പുരോഗമിക്കുകയാണ്.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍