കല്‍പ്പറ്റ: വാണിജ്യ പാചക വാതക സിലിണ്ടറിന് ആയിരം രൂപ വര്‍ദ്ധിപ്പിച്ച നടപടി പിന്‍വലിക്കണമെന്ന് ആവശ്യപ്പെട്ടുകൊണ്ട് സംസ്ഥാന വ്യാപകമായി നാളെ (മെയ് 6) നടത്തുന്ന 24 മണിക്കൂര്‍ കടയടപ്പ് സമരത്തില്‍ വയനാട് ജില്ലയിലെ ഭക്ഷണ വിതരണമേഖലയില്‍ പ്രവര്‍ത്തിക്കുന്നവരും പങ്കെടുക്കുമെന്ന് കേരള ഹോട്ടല്‍ ആന്റ് റസ്‌റ്റോറന്റ് അസോസിയേഷന്‍ വയനാട് ജില്ലാ കമ്മിറ്റി ഭാരവാഹികള്‍ അറിയിച്ചു. പാചകവാതകത്തിന്റെ നിയന്ത്രണാധിതമായ വിക്കയറ്റം ഹോട്ടല്‍ വ്യവസായ മേഖലയില്‍ നന്നായി ബാധിച്ചിട്ടുണ്ട്. ഇന്നത്തെ സാഹചര്യത്തില്‍ പല സ്ഥാപനങ്ങളും വലിയ നഷ്ടം സഹിച്ചാണ് മുന്നോട്ടുപോകുന്നത്. ചില സ്ഥാപനങ്ങള്‍ ഇപ്പോള്‍ തന്നെ അടച്ചിരിക്കുകയാണ്, പ്രത്യക്ഷമായും പരോക്ഷമായും പതിനായിരക്കണക്കിന് തൊഴിലാളികളാണ് ഈ മേഖലയെ ആശ്രയിച്ച് ജീവിക്കുന്നത്. ഹോട്ടലുകള്‍ അടച്ചാല്‍ ഇവര്‍ക്കും പണിയില്ലാതെയാകുമെന്നും കേരളഹോട്ടല്‍ ആന്റ് റസ്‌റ്റോറന്റ് അസോസിയേഷന്‍ വയനാട് ജില്ലാ കമ്മിറ്റി.

അതോടൊപ്പം തന്നെ ഹോട്ടലുകളെ ഉപയോഗിച്ച് ഭക്ഷണം കഴിക്കുന്ന സാധാരണ ജനങ്ങള്‍ക്കും ആശുപത്രി ഉള്‍പ്പെടെയുള്ള സ്ഥാപനങ്ങള്‍ക്ക് മുന്നില്‍ പ്രവര്‍ത്തിക്കുന്ന സ്ഥാപനങ്ങളും അടയ്ക്കുന്നതോടെ ബുദ്ധിമുട്ട് ഏറുകയാണ്. ഈ നില തുടര്‍ന്നാല്‍ ഭക്ഷണസാധനങ്ങള്‍ക്ക് വില വര്‍ദ്ധിപ്പിക്കുകയല്ലാതെ മറ്റൊരു മാര്‍ഗവും ഹോട്ടലുകാരുടെ മുന്‍പില്‍ ഇല്ല. വൈദ്യുതി ചാര്‍ജ് പോലും വന്‍തോതില്‍ ആണ് വര്‍ദ്ധിച്ചിരിക്കുന്നത്. ഈ വിഷയങ്ങളിലെല്ലാം സര്‍ക്കാര്‍ അടിയന്തരമായി ഇടപെടണമെന്ന് ആവശ്യപ്പെട്ടു കൊണ്ടാണ് സമരം നടത്തുന്നത്. ആറിന് സ്ഥാപനങ്ങള്‍ അടച്ചിട്ട് രാവിലെ 10 മണിയോടുകൂടി കല്‍പ്പറ്റ ജൈത്രതിയേറ്റര്‍ പരിസരത്തുനിന്ന് ആരംഭിക്കുന്ന മാര്‍ച്ച് കല്‍പ്പറ്റ ഹെഡ് പോസ്റ്റ് ഓഫീസിനു മുന്നിലെത്തി ധര്‍ണ്ണ സമരം നടത്തും. വ്യാപാര മേഖലയിലെ പ്രമുഖ നേതാക്കള്‍ ആശംസകള്‍ അര്‍പ്പിച്ച് സംസാരിക്കുമെന്നും ഭാരവാഹികള്‍ അറിയിച്ചു.
അനീഷ് ബി. നായര്‍ (സംസ്ഥാന സെക്രട്ടറി), മുജീബ് ചുണ്ടേല്‍ (ജില്ലാ പ്രസിഡണ്ട്, വിജു മന്ന ജില്ലാ സെക്രട്ടറി) എന്നിവര്‍ സംസാരിച്ചു.