സ്‌കൂട്ടറില്‍ കാട്ടുപോത്ത് ഇടിച്ചു; യാത്രികന് പരിക്ക്
പനവല്ലി: കാട്ടുപോത്ത് തട്ടിയതിനെ തുടര്‍ന്ന് സ്‌കൂട്ടര്‍ യാത്രികന് പരിക്കേറ്റു. അപ്പപ്പാറ തോട്ടുംകര ഷൈജു (46) വിനാണ് പരിക്കേറ്റത്. ലോട്ടറി വില്‍പ്പനകാരനായ ഷൈജു സ്‌കൂട്ടറില്‍ വീട്ടിലേക്ക് മടങ്ങും വഴി പനവല്ലി കാപ്പികണ്ടി ഭാഗത്തു വെച്ച് രാത്രി ഏഴരയോടെയായിരുന്നു സംഭവം. റോഡിന്റെ കുറുകേ പാഞ്ഞു പോകുകയായിരുന്ന കാട്ടുപോത്ത് സ്‌കൂട്ടറില്‍ വന്നിടിച്ചതോടെ സ്‌കൂട്ടറില്‍ നിന്നും മറിഞ്ഞ് വീണാണ് ഷൈജുവിന് പരിക്കേറ്റതെന്നാണ് പ്രാഥമിക വിവരം. പുറകെ വന്ന നാട്ടുകാര്‍ ഉടന്‍ തന്നെ ഷൈജുവിനെ കാട്ടിക്കുളത്തെ സ്വകാര്യ ആശുപത്രിയിലെത്തിച്ചു പ്രഥമ ശുശ്രൂഷ നല്‍കി. വിവരമറിഞ്ഞയുടന്‍ സ്ഥലത്തെത്തിയ തൃശിലേരി സെക്ഷന്‍ ഫോറസ്റ്റ് ഓഫീസര്‍ രതീഷ് കുമാറിന്റെ നേതൃത്വത്തില്‍ പിന്നീട് ഷൈജുവിനെ തുടര്‍ ചികിത്സാര്‍ത്ഥം മാനന്തവാടിയിലെ മെഡിക്കല്‍ കോളേജ് ആശുപത്രിയിലെത്തിച്ചു. മുഖത്തും പല്ലിനുമാണ് പരിക്ക്. ഈ ഭാഗത്ത് പകല്‍ പോലും കാട്ടുപോത്ത് കൂട്ടമായി ഇറങ്ങാറുണ്ടെന്ന് നാട്ടുകാര്‍ പറഞ്ഞു.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍