ജില്ലാതല ഉദ്ഘാടന പരിപാടി വൈത്തിരി ഗവ.എല്‍.പി.സ്‌കൂളില്‍ ; കുത്തിവെപ്പിനെതിരെയുള്ള വ്യാജപ്രചരണങ്ങള്‍ തള്ളിക്കളയണമെന്ന് ആരോഗ്യവകുപ്പ്

മീസില്‍സ്-റുബല്ല പ്രതിരോധയജ്ജത്തിന് ഒക്ടോബര്‍ 3ന് ജില്ലയില്‍ തുടക്കമാകും. പ്രതിരോധയജ്ഞത്തിന്റെ ജില്ലാതല ഉദ്ഘാടന പരിപാടി വൈത്തിരി ഗവ.എല്‍.പി.സ്‌കൂളില്‍ വെച്ച് ഒക്ടോബര്‍ 3ന് രാവിലെ 10 മണിക്ക് കല്‍പ്പറ്റ എം.എല്‍.എ.സി.കെ.ശശിന്ദ്രന്‍ നിര്‍വഹിക്കും. ജില്ലയില്‍ 9 മാസം മുതല്‍ 15 വയസ്സ് വരെയുള്ള 1,97,142 കുട്ടികള്‍ക്ക് കുത്തിവെയ്പ് നല്‍കും. ഇതിനായി 1885 സെക്ഷനുകള്‍ ഒരുക്കുമെന്നും, അന്നേദിവസം പ്രസ്തുത വയസ്സിലുള്ള കുട്ടികള്‍ക്ക് നിര്‍ബന്ധമായും കുത്തിവെപ്പെടുക്കണമെന്നും ആരോഗ്യവകുപ്പ് അറിയിച്ചു.

ഇന്ത്യയില്‍ പ്രതിവര്‍ഷം നാല്‍പതിനായിരത്തിലധികം കുട്ടികള്‍ അഞ്ചാംപനി (മീസില്‍സ്) ബാധിച്ച് മരിക്കുകയും നിരവധി കുട്ടികള്‍ക്ക് റൂബെല്ല  ബാധിച്ച് ജന്മവെകല്യം  സംഭവിക്കുന്നുണ്ട്. ഈ രോഗങ്ങളെ പ്രതിരോധിക്കുന്നതിന് വേണ്ടി ലോകാരോഗ്യ സംഘടന നിര്‍ദേശിച്ച എം.ആര്‍ വാക്സിന്‍ ജില്ലയിലെ 9 മുതല്‍ 15 വയസ്സ് വരെയുള്ള കുട്ടികള്‍ക്ക് ഒക്ടോബര്‍ 03 മുതല്‍ നല്‍കിതുടങ്ങും.  അഞ്ചാം പനി കാരണം ന്യൂമോണിയ, വയറിളക്കം, ജീവന് ഭീഷണിയായേക്കാവുന്ന മറ്റു തകരാറുകള്‍ എന്നിവയും, ഗര്‍ഭകാലത്തുണ്ടാകുന്ന റുബെല്ലമൂലം കുഞ്ഞുങ്ങള്‍ക്ക് അന്ധത,ബധിരത,ബുദ്ധിമാന്ദ്യം,ഹൃദയ വൈകല്ല്യം, ജന്മനായുള്ള മറ്റ് വൈകല്ല്യങ്ങള്‍ എന്നിവയും ഉണ്ടാകുന്നതായി ആരോഗ്യവകുപ്പ് ഉദ്യോഗസ്ഥര്‍ അറിയിച്ചു.

റുബെല്ല ഗര്‍ഭിണികളില്‍ പ്രത്യേകിച്ച് പ്രശ്നമൊന്നും ഉണ്ടാക്കുന്നില്ലെങ്കിലും വൈകല്ല്യത്തോടെ ജനിക്കുന്ന കുട്ടികള്‍ കുടുംബത്തിനെ മാനസികമായി തളര്‍ത്തുന്ന അവസ്ഥയ്ക്ക് വരെ കാരണമാകുന്നു. ഇത്തരം രോഗങ്ങള്‍ക്കെതിരെ കര്‍ശനപ്രതിരോധ പ്രവര്‍ത്തനങ്ങള്‍ അവലംഭിക്കുന്നതിന്റെ ഭാഗമായാണ് ജില്ലയിലും ഒക്ടോബര്‍ 03 മുതല്‍ പ്രതിരോധകുത്തിവെപ്പ് നല്‍കുന്നതെന്ന് ആരോഗ്യവകുപ്പ് ഉദ്യോഗസ്ഥര്‍ വാര്‍ത്താസമ്മേളനത്തില്‍ പറഞ്ഞു.

ജില്ലയില്‍ 9 മുതല്‍ 15 വയസ്സ് വരെയുള്ള 1,97,142 കുട്ടികള്‍ക്ക് കുത്തിവെയ്പ് നല്‍കും. ഇതിനായി 1885 സെക്ഷനുകള്‍ ഒരുക്കിയിട്ടുണ്ട്. 266 വാക്സിനേറ്റര്‍മാരെ പ്രത്യേക പരിശീലനം നല്‍കുകയും 262 സ്‌കൂളില്‍ പി.ടി.എ.യോഗം ചേരുകയും എല്ലാ സ്‌കൂളുകളിലും നോഡല്‍ ടീച്ചര്‍മാരെ നിയോഗിക്കുകയം ചെയ്തിട്ടുണ്ട്. കുത്തിവെയ്പ്പിന് എതിരെ ചില പ്രദേശങ്ങളില്‍ നിന്ന് എതിര്‍പ്പ് ഉണ്ടായിട്ടുണ്ട്.് ഇവിടങ്ങളില്‍ പ്രത്യേക ബോധവല്‍ക്കരണ പരിപാടിയും സംഘടിപ്പിച്ചിണ്ടുന്ന് വയനാട് ഡി.എം.ഒ.യുടെ ചുമതല വഹിക്കുന്ന ഡോ.വി.ജിതേഷ്, മാസ് മിഡയ ഓഫിസര്‍ കെ. ഇബ്രാഹിം എന്നിവര്‍ വാര്‍ത്താ സമ്മേളനത്തില്‍ അറിയിച്ചു.