സംസ്ഥാനത്ത് പതിനാല് പേര്ക്ക് കൂടി സിക്ക വൈറസ് ബാധ
തിരുവനന്തപുരം: സംസ്ഥാനത്ത് പതിനാല് പേര്ക്ക് കൂടി സിക്ക വൈറസ് ബാധ സ്ഥിരീകരിച്ചു. തിരുവനന്തപുരം നഗരസഭാ പരിധിയിലാണ് പതിനാല് കേസുകളും റിപ്പോര്ട്ട് ചെയ്തിരിക്കുന്നത്. പൂനെ വൈറോളജി ഇന്സ്റ്റിറ്റിയൂട്ടില് നടത്തിയ പരിശോധനയിലാണ് പതിനാല് പേര്ക്ക് കൂടി രോഗം സ്ഥിരീകരിച്ചത്.ഇന്നലെയാണ് സംസ്ഥാനത്ത് ആദ്യമായി സിക്ക വൈറസ് ബാധ സ്ഥിരീകരിച്ചത്. തിരുവനന്തപുരത്ത് സ്വകാര്യ ആശുപത്രിയില് ചികിത്സയിലുള്ള പാറശാല സ്വദേശിയായ 24 കാരിക്കാണ് രോഗം റിപ്പോര്ട്ട് ചെയ്തത്. നിലവില് യുവതിയുടെ ആരോഗ്യനില തൃപ്തികരമാണ്. ഗര്ഭിണിയായിരിക്കെയാണ് യുവതിയുടെ സാംപിള് പരിശോധനയ്ക്ക് അയച്ചത്. ജൂലൈ 7ന് യുവതിയുടെ പ്രസവം സാധാരണ നിലയില് നടന്നു. ഒരാഴ്ച മുമ്പ് അവരുടെ അമ്മയ്ക്കും സമാനമായ രോഗ ലക്ഷണങ്ങള് ഉണ്ടായിരുന്നു.
പ്രധാനമായും ഈഡിസ് കൊതുകുകള് പരത്തുന്ന രോഗമാണ് സിക്ക. പനി, ചുവന്ന പാടുകള്, പേശി വേദന, സന്ധി വേദന, തലവേദന എന്നിവയാണ് പ്രധാന ലക്ഷണങ്ങള്. സാധാരണയായി 2 മുതല് 7 ദിവസം വരെ രോഗലക്ഷണങ്ങള് നീണ്ടുനില്ക്കും. 3 മുതല് 14 ദിവസമാണ് സിക്ക വൈറസിന്റെ ഇന്കുബേഷന് കാലയളവ്. സിക്ക വൈറസ് അണുബാധയുള്ള മിക്ക ആളുകള്ക്കും രോഗലക്ഷണങ്ങള് കാണാറില്ല. മരണങ്ങള് അപൂര്വമാണ്. ഗര്ഭിണികളേയാണ് സിക്ക വൈറസ് സാരമായി ബാധിക്കുന്നത്. ഗര്ഭകാലത്തുള്ള സിക്ക വൈറസ് ജനിക്കുന്ന കുട്ടികളുടെ അംഗ വൈകല്യത്തിന് കാരണമാകും. ഗര്ഭകാലത്തുള്ള സങ്കീര്ണതയ്ക്കും ഗര്ഭഛിത്രത്തിനും കാരണമായേക്കാം. കുട്ടികളിലും മുതിര്ന്നവരിലും സിക്ക ബാധിച്ചാല് നാഡീസംബന്ധമായ പ്രശങ്ങളിലെത്തിക്കും. നിലവില് സിക്ക വൈറസ് രോഗം പ്രതിരോധിക്കാനോ ചികിത്സിക്കാനോയുള്ള മരുന്ന് ലഭ്യമല്ല. അനുബന്ധ ചികിത്സയാണ് നടത്തുന്നത്. രോഗ ലക്ഷണങ്ങളുള്ളവര് മതിയായ വിശ്രമമെടുക്കുകയും ധാരാളം വെള്ളം കുടിക്കുകയും വേണം. രോഗ ലക്ഷണങ്ങള് കൂടുന്നെങ്കില് ചികിത്സ തേടേണ്ടതാണ്.
കമന്റ് ബോക്സില് വരുന്ന അഭിപ്രായങ്ങള് ഓപ്പൺന്യൂസറിന്റെത് അല്ല. മാന്യമായ ഭാഷയില് വിയോജിക്കാനും തെറ്റുകള് ചൂണ്ടി കാട്ടാനും അനുവദിക്കുമ്പോഴും മനഃപൂര്വ്വം അധിക്ഷേപിക്കാന് ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്