തദ്ദേശ സ്ഥാപനങ്ങള് പുതിയ വെല്ലുവിളികള് ഏറ്റെടുക്കണം:മന്ത്രി എ.സി മൊയ്തീന്
വെത്തിരി: പുതിയ കാലത്തെ വെല്ലുവിളികള് ഏറ്റെടുക്കാന് തദ്ദേശ സ്വയം ഭരണ സ്ഥാപനങ്ങള്ക്ക് കഴിയണമെന്ന് മന്ത്രി എ.സി മൊയ്തീന് പറഞ്ഞു. വൈത്തിരി വില്ലേജ് റിസോര്ട്ടില് നടന്ന സംസ്ഥാനതല പഞ്ചായത്ത് ദിനാഘോഷത്തിന്റെ ഉദ്ഘാടന ചടങ്ങില് അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. തദ്ദേശ സ്ഥാപനങ്ങളിലെ ഭരണ സമിതി അവസാന വര്ഷത്തിലേക്ക് കടക്കുകയാണ്. പദ്ധതി ആസൂത്രണ പ്രവര്ത്തനങ്ങളില് ആലംഭാവം കാണിക്കരുത്. വരുന്ന സാമ്പത്തിക വര്ഷത്തേക്കുള്ള പദ്ധതികള് പ്രദേശിക പ്രശ്നങ്ങളെ അതിജീവിക്കുന്ന തരത്തിലാവണം രൂപീകരിക്കേണ്ടത്. വിവിധ വകുപ്പുകളുടെ ഫണ്ടുകള് സംയോജിപ്പിച്ച് പദ്ധതികള് തയ്യാറാക്കുന്നതിന്റെ സാധ്യത ഉപയോഗപ്പെടുത്തണമെന്നും മന്ത്രി പറഞ്ഞു.
മാലിന്യ സംസ്കരണ വിഷയങ്ങളിലും ദുരന്ത നിവാരണ പ്രവര്ത്തനങ്ങളിലും കൂടുതല് ഇടപെടലുകള് വേണം. ദുരന്ത നിവാരണ ആക്ഷന് പ്ലാനുകളില് കൃത്യമായ പ്രാദേശിക അടിസ്ഥാന വിവരങ്ങള് ഉള്പ്പെടുത്തണമെന്നും അദ്ദേഹം പറഞ്ഞു. അനുഭവങ്ങളുടെ വെളിച്ചത്തില് വെല്ലുവിളികളെ ഏറ്റെടുക്കാനുള്ള ചുമതലകളാണ് തദ്ദേശ സ്വയം ഭരണ സ്ഥാപനങ്ങള്ക്കുള്ളത്.പദ്ധതി പണം ചെലവഴിക്കുന്നത് സാമൂഹ്യ, സാമ്പത്തിക പുരോഗതിക്ക് മുതല്ക്കൂട്ടാവണം. പദ്ധതി നിര്വഹണത്തില് മികച്ച നേട്ടമാണ് കഴിഞ്ഞ വര്ഷം സംസ്ഥാനത്തുണ്ടായതെന്നും മന്ത്രി പറഞ്ഞു.തദ്ദേശ സ്ഥാപനങ്ങളുടെ പദ്ധതി വിഹിതം വെട്ടിക്കുറക്കില്ലെന്നും അദ്ദേഹം പറഞ്ഞു.
കമന്റ് ബോക്സില് വരുന്ന അഭിപ്രായങ്ങള് ഓപ്പൺന്യൂസറിന്റെത് അല്ല. മാന്യമായ ഭാഷയില് വിയോജിക്കാനും തെറ്റുകള് ചൂണ്ടി കാട്ടാനും അനുവദിക്കുമ്പോഴും മനഃപൂര്വ്വം അധിക്ഷേപിക്കാന് ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്