വയനാട് മെഡിക്കല്‍ കോളേജില്‍ കാര്‍ഡിയോളജിസ്റ്റിന്റെ സ്ഥിരം തസ്തിക സൃഷ്ടിക്കും.
തിരുവനന്തപുരം: വയനാട് മെഡിക്കല്‍ കോളേജ് ആശുപത്രിയില്‍ കാര്‍ഡിയോളജിസ്റ്റിന്റെ സ്ഥിരം തസ്തിക സൃഷ്ടിക്കാന്‍ തീരുമാനം. പട്ടിക ജാതി പട്ടിക വര്‍ഗ പിന്നാക്ക ക്ഷേമ വിഭാഗ വകുപ്പ് മന്ത്രി ഒ ആര്‍ കേളുവിന്റെ ആവശ്യപ്രകാരം വയനാട് മെഡിക്കല്‍ കോളേജ് പ്രവര്‍ത്തനം സംബന്ധിച്ച് തിരുവനന്തപുരത്ത് ആരോഗ്യ വകുപ്പ് മന്ത്രി വിളിച്ചു ചേര്‍ത്ത അവലോകന യോഗത്തിലാണ് സുപ്രധാന തീരുമാനം ഉണ്ടായത്. കാത്ത് ലാബ് പൂര്‍ണ തോതില്‍ സജ്ജമായി കഴിഞ്ഞ വയനാട് മെഡിക്കല്‍ കോളേജില്‍ ആഴ്ചയില്‍ രണ്ട് ദിവസം സമീപ ജില്ലകളിലെ ഡോക്ടര്‍മാരുടെ സേവനം ആണ് നിലവില്‍ കാര്‍ഡിയോളജി വിഭാഗത്തില്‍ ലഭ്യമായിരുന്നത്. പുതിയ തസ്തിക സൃഷ്ടിച്ച് കാര്‍ഡിയോളജിസ്റ്റിനെ നിയമിക്കുന്നതോടെ കൂടുതല്‍ ഹൃദ്രോഗ സംബന്ധമായ രോഗികള്‍ക്ക് ഏറെ ആശ്വാസമാകും. വയനാട് ജില്ലയിലെ സര്‍ക്കാര്‍ മേഖലയിലെ ആദ്യ കാര്‍ഡിയോളജിസ്റ്റ് തസ്തിക കൂടിയാകും ഇത്.
വയനാട് മെഡിക്കല്‍ കോളേജിലെ മെഡിക്കല്‍ വിദ്യാര്‍ത്ഥി പ്രവേശം ആരംഭിക്കുന്നതിനായുള്ള നടപടികള്‍ ത്വരിതപ്പെടുത്താനും യോഗത്തില്‍ മന്ത്രി ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കി.
യോഗത്തില്‍ പട്ടിക ജാതി പട്ടിക വര്‍ഗ പിന്നാക്ക വിഭാഗ ക്ഷേമ വകുപ്പ് മന്ത്രി ഒ ആര്‍ കേളു, ആരോഗ്യ വകുപ്പ് അഡീഷണല്‍ ചീഫ് സെക്രട്ടറി ഡോ .രാജന്‍ ഗോബ്രഗഡെ, മെഡിക്കല്‍ എജ്യുക്കേഷന്‍ ഡയറക്ടര്‍ ഡോ:തോമസ് മാത്യു, വയനാട് മെഡിക്കല്‍ കോളേജ് പ്രിന്‍സിപ്പാള്‍ ഡോ.കെ.എസ് മീന ഉള്‍പ്പെടെയുള്ളവര്‍ പങ്കെടുത്തു.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍