കുവൈറ്റ്: ചികിത്സയ്ക്കായി ചുരം ഇറങ്ങുന്നതിനിടെ പലപ്പോഴും ജീവന്‍ നഷ്ടപ്പെടുന്ന വയനാട്ടുകാരുടെ ദീര്‍ഘകാല വേദനയ്ക്ക് ശാശ്വത പരിഹാരം കാണാന്‍ മാനന്തവാടിയില്‍ തന്നെ സമ്പൂര്‍ണ്ണ മെഡിക്കല്‍ കോളേജ് യാഥാര്‍ഥ്യമാക്കണമെന്ന് ഇന്‍കാസ് കുവൈറ്റ് വയനാട് ജില്ലാ കണ്‍വീനര്‍ അലക്‌സ് കൂട്ടുങ്കല്‍ ആവശ്യപ്പെട്ടു.ഇന്‍കാസ് കുവൈറ്റ് വയനാട് ജില്ലാ ഘടകം കുവൈറ്റില്‍ സംഘടിപ്പിച്ച യോഗത്തില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. അലക്‌സ് കൂട്ടുങ്കലിന്റെ അധ്യക്ഷതയില്‍ ചേര്‍ന്ന യോഗം, മാനന്തവാടിയില്‍ മെഡിക്കല്‍ കോളേജ് യാഥാര്‍ഥ്യമാക്കണമെന്നാവശ്യപ്പെട്ടുള്ള പ്രമേയം ഏകകണ്ഠമായി പാസാക്കി. പദ്ധതി വൈകിപ്പിക്കാനോ വഴിതിരിച്ചുവിടാനോ അട്ടിമറിക്കാനോ ഇടയാക്കുന്ന ഏതൊരു നീക്കത്തെയും ശക്തമായി എതിര്‍ക്കണമെന്ന് യോഗം ആവശ്യപ്പെട്ടു.

വയനാട്ടില്‍ ഗുരുതര അപകടങ്ങളോ അടിയന്തര ചികിത്സ ആവശ്യമുള്ള സാഹചര്യങ്ങളോ ഉണ്ടാകുമ്പോള്‍ ആധുനിക ചികിത്സാ സൗകര്യങ്ങള്‍ തേടി ഇന്നും മണിക്കൂറുകളോളം ചുരം ഇറങ്ങി കോഴിക്കോട്, കണ്ണൂര്‍ തുടങ്ങിയ ജില്ലകളിലേക്ക് പോകേണ്ടിവരുന്ന സാഹചര്യം മാറേണ്ടതുണ്ടെന്ന് യോഗം ചൂണ്ടിക്കാട്ടി.

മെഡിക്കല്‍ കോളേജ് വയനാടിന് ഒരു വികസന പദ്ധതി മാത്രമല്ല; ഒരു രോഗിയുടെ ജീവനും ഒരു കുടുംബത്തിന്റെ പ്രതീക്ഷയും ഒരു നാടിന്റെ സുരക്ഷയുമാണ്. ചികിത്സ ലഭിക്കാന്‍ കിലോമീറ്ററുകള്‍ താണ്ടേണ്ടിവരുന്ന സാഹചര്യം അവസാനിക്കണം. ഒരു ജീവന്‍ പോലും ചികിത്സ ലഭിക്കാതെ വഴിയില്‍ നഷ്ടപ്പെടാതിരിക്കാനുള്ള സംവിധാനമാണ് വയനാടിന് ആവശ്യമെന്ന് ഇന്‍കാസ് കുവൈറ്റ്–വയനാട് ജില്ലാ കണ്‍വീനര്‍ എബി ഊനേത്ത് (പുല്‍പ്പള്ളി) പറഞ്ഞു.

മാനന്തവാടിയില്‍ മെഡിക്കല്‍ കോളേജ് സ്ഥാപിക്കുന്നതിനുള്ള നടപടികള്‍ മുന്നോട്ടുപോകുന്ന സാഹചര്യത്തില്‍, വിവിധ താല്‍പര്യങ്ങളുടെ പേരില്‍ പദ്ധതിയെ മറ്റൊരു ദിശയിലേക്ക് മാറ്റാനോ അനാവശ്യമായി വൈകിപ്പിക്കാനോ ഉള്ള നീക്കങ്ങള്‍ ഉണ്ടാകരുതെന്നും യോഗം ആവശ്യപ്പെട്ടു. 'ഇവിടെ വേണം, അവിടെ വേണം' എന്ന തരത്തിലുള്ള പ്രാദേശിക വിവാദങ്ങള്‍ ഉയര്‍ത്തി നിലവില്‍ ലഭിച്ചിട്ടുള്ള അനുമതികളും പുരോഗതിയും നഷ്ടപ്പെടുത്തുന്നത് വയനാട്ടുകാരുടെ ദീര്‍ഘകാല സ്വപ്നത്തിന് തിരിച്ചടിയാകുമെന്ന് യോഗം വിലയിരുത്തി.

പദ്ധതിയുടെ പേരില്‍ ഇനിയും തര്‍ക്കങ്ങളും കാലതാമസവും ഉണ്ടാകരുത്. വയനാട്ടുകാരുടെ തലമുറകളായുള്ള ആരോഗ്യസുരക്ഷയുമായി ബന്ധപ്പെട്ട വിഷയമാണിത്. രാഷ്ട്രീയവും പ്രാദേശികവുമായ താല്‍പര്യങ്ങള്‍ക്കപ്പുറം വയനാടിന്റെ ഭാവിയാണ് പരിഗണിക്കേണ്ടതെന്ന് യോഗത്തില്‍ സംസാരിച്ച വിനേഷ് ജോര്‍ജ് (പുല്‍പ്പള്ളി) പറഞ്ഞു.

മാനന്തവാടി ടൗണില്‍ തന്നെ അനുയോജ്യമായ സ്ഥലം കണ്ടെത്തി പദ്ധതി എത്രയും വേഗം യാഥാര്‍ഥ്യമാക്കണമെന്നും യോഗം ആവശ്യപ്പെട്ടു. വയനാടിന്റെ ഭൂമിശാസ്ത്രപരമായ പ്രത്യേകതകളും ജനങ്ങളുടെ ആരോഗ്യാവശ്യങ്ങളും അപകടസാധ്യതകളും പരിഗണിച്ച് കേരളത്തിലെ തന്നെ മികച്ച ആരോഗ്യപരിചരണ കേന്ദ്രങ്ങളിലൊന്നായി മാനന്തവാടി മെഡിക്കല്‍ കോളേജിനെ വികസിപ്പിക്കണമെന്നും യോഗം ആവശ്യപ്പെട്ടു.

വയനാട്ടില്‍ ഒരു അപകടം സംഭവിക്കുമ്പോള്‍ 'ആശുപത്രിയിലെത്തുമോ?' എന്ന ആശങ്കയില്‍ ഒരു കുടുംബവും കഴിയേണ്ടിവരരുത്. ചികിത്സയ്ക്കായി ചുരം ഇറങ്ങുന്നതിനിടെ ഒരു ജീവനും നഷ്ടപ്പെടരുത്. ഈ യാഥാര്‍ഥ്യം മനസ്സിലാക്കി മെഡിക്കല്‍ കോളേജ് വിഷയത്തില്‍ വയനാട്ടുകാര്‍ ഒരുമിച്ച് നില്‍ക്കേണ്ട സമയമാണിതെന്നും യോഗം അഭിപ്രായപ്പെട്ടു.

മാനന്തവാടിയിലെ മെഡിക്കല്‍ കോളേജ് ഒരു പ്രദേശത്തിന്റെ മാത്രം ആവശ്യമായല്ല; വയനാടിന്റെ മുഴുവന്‍ ജനതയുടെയും ജീവനും ആരോഗ്യവും സുരക്ഷിതമാക്കാനുള്ള പൊതുസമ്പത്താണ്. രാഷ്ട്രീയവും പ്രാദേശികവുമായ ഭിന്നതകള്‍ മാറ്റിവെച്ച് മാനന്തവാടിയില്‍ സമ്പൂര്‍ണ മെഡിക്കല്‍ കോളേജ് എത്രയും വേഗം യാഥാര്‍ഥ്യമാക്കാനുള്ള ശ്രമങ്ങള്‍ക്ക് എല്ലാ വയനാട്ടുകാരും ഒറ്റക്കെട്ടായി പിന്തുണ നല്‍കണമെന്ന് ഇന്‍കാസ് കുവൈറ്റ്–വയനാട് ആഹ്വാനം ചെയ്തു