റിയാദ്: വയനാടന്‍ പ്രവാസി അസോസിയേഷന്‍ റിയാദിന്റെ ആഭിമുഖ്യത്തില്‍ സംഘടനയുടെ പ്രഥമ ഇഫ്താര്‍ സംഗമം സുലൈ ഓയാസിസ് ഇസ്ത്രയില്‍ വെച്ച് 500ലധികം അംഗങ്ങളുടെ സാന്നിധ്യത്തില്‍ ഗംഭീരമായി സംഘടിപ്പിച്ചു. സംഘടനയുടെ ഐക്യവും കൂട്ടായ്മയും പ്രതിഫലിപ്പിച്ച വേദിയായാണ് ഈ സംഗമം മാറിയത്.അംഗങ്ങള്‍ക്ക് പുറമെ റിയാദിലെ വിവിധ സാമൂഹികസാംസ്‌കാരിക സംഘടനകളിലെ പ്രമുഖ നേതാക്കളും ചടങ്ങില്‍ പങ്കെടുത്ത് റമദാന്‍ ആശംസകള്‍ നേര്‍ന്നു. സഹോദരത്വത്തിന്റെയും സൗഹൃദത്തിന്റെയും സന്ദേശം പങ്കുവെച്ച ഇഫ്താര്‍ സംഗമം ആത്മീയമായ അനുഭവമായി മാറി.
പ്രോഗ്രാം കോഡിനേറ്റര്‍മാരായ നിഖില്‍, നിജാസ് എന്നിവരുടെ ഏകോപനത്തിലും വൈസ് പ്രസിഡണ്ട് ബിനു കുടക്കച്ചിറ, സെക്രട്ടറി വര്‍ഗീസ് പൂക്കോള എന്നിവരുടെ നേതൃത്വത്തിലും അസോസിയേഷന്‍ എക്‌സിക്യൂട്ടീവ് അംഗങ്ങളുടെ കൂട്ടായ പരിശ്രമഫലമായാണ് പരിപാടി വന്‍ വിജയമായി മാറിയത്.സംഘടനയുടെ കൂട്ടായ പ്രവര്‍ത്തനശൈലി വീണ്ടും തെളിയിച്ച ഈ ഇഫ്താര്‍ സംഗമം റിയാദിലെ പ്രവാസി സമൂഹത്തില്‍ ശ്രദ്ധേയമായി.