നവകേരളീയം സഹകരണ ബാങ്ക് കുടിശ്ശിക നിവാരണം തുടങ്ങി
സഹകരണ വായ്പാ സ്ഥാപനങ്ങളില് നിന്നും ബാങ്കുകളില് നിന്നും വായ്പയെടുത്ത് തിരിച്ചടവ് മുടങ്ങിയവര്ക്കായി നവകേരളം കുടിശ്ശിക നിവാരണ പദ്ധതി നടപ്പാക്കുന്നു. മാര്ച്ച് 25 വരെയാണ് പ്രത്യേക കുടിശ്ശിക നിവാരണ പദ്ധതിയില് ഇളവ് ലഭിക്കുക. 2017 ഡിസംബര് 31 വരെ പൂര്ണ്ണമായും ഭാഗികമായും കുടിശ്ശികയായ വായ്പകള്ക്ക് 10 ശതമാനം മുതല് 50 ശതമാനം വരെയാണ് പലിശ ഇളവ് ലഭിക്കുക. രോഗ ബാധിതര്, മരണപ്പെട്ടവരുടെ ആശ്രിതര് എന്നിവര്ക്കും വായ്പ തിരിച്ചടവില് ഇളവ് ലഭിക്കും. പിഴ പലിശയും മറ്റു ചാര്ജ്ജുകളും പൂര്ണ്ണമായും ഒഴിവാക്കും. വായ്പ കുടിശ്ശിക വരുത്താതെ കൃത്യമായി തിരിച്ചടച്ചവര്ക്കും 10 ശതമാനം ആനുകൂല്യം ലഭിക്കും.
ജില്ലയിലെ സഹകരണ സ്ഥാപനങ്ങളില് നിന്നും വായ്പയെടുത്തവര് കുടിശ്ശിക നിവാരണത്തിന് ബാങ്കുകളുമായി ബന്ധപ്പെടണം. വായ്പാ കുടിശ്ശിക നിവാരണത്തിന് അദാലത്തുകള് നടത്താന് ജില്ലാ തല സഹകരണ സ്ഥാപനങ്ങളുടെ പ്രതിനിധി യോഗം തീരുമാനിച്ചു. സഹകരണ സംഘം ജോയിന്റ് രജിസ്ട്രാര് വി.മുഹമ്മദ് നൗഷാദ് അദ്ധ്യക്ഷത വഹിച്ചു. പ്ലാനിങ്ങ് അസി.രജിസ്ട്രാര് അബ്ദുള് റഷീദ് തിണ്ടുമ്മല്, ജില്ലാ ബാങ്ക് ഡെപ്യൂട്ടി ജനറല് മാനേജര് ഷിബു, അസിസ്റ്റന്റ് രജിസ്ട്രാര് എം.സജീര്, ജോണ്സണ്, ഖദീജ, ലതിക, അസീസ് തുടങ്ങിയവര് പങ്കെടുത്തു. ജില്ലാ ജോയിന്റ് രജിസ്ട്രാര് ചെയര്മാനും ജില്ലാ ഓഡിറ്റ് ജോയിന്റ് ഡയറക്ടര് കണ്വീനറുമായിട്ടുള്ള ജില്ലാ തല കമ്മറ്റി രൂപവതര്കരിച്ചു.
