ജില്ലയില്‍ ബസ്സുകള്‍ കേന്ദ്രീകരിച്ച് ജില്ലാ പോലീസ് കര്‍ശന പരിശോധന ആരംഭിച്ചു. ജില്ലാ പോലീസ് മേധാവിയുടെ നിര്‍ദ്ദേശപ്രകാരമാണ് പരിശോധന. ഇന്ന് നടന്ന പരിശോധനയില്‍ മാനന്തവാടി ബസ് സ്റ്റാന്റില്‍വെച്ച് മദ്യപിച്ച് വാഹനമോടിച്ച ഡ്രൈവറെ പോലീസ് അറസ്റ്റ് ചെയ്തു. മാനന്തവാടി-നിരവില്‍പ്പുഴ റൂട്ടിലോടുന്ന ഹിന്ദുസ്ഥാന്‍ ബസ്സിലെ ഡ്രൈവറായ മൊതക്കര കപ്യാര്‍മലയില്‍ കെടി സുഭാഷി (37) നെതിരെയാണ് കേസ്സെടുത്തത്. നിരവധി യാത്രക്കാരുമായി സഞ്ചരിക്കുന്ന ബസ്സുകളിലെ സുരക്ഷ ഉറപ്പ് വരുത്തുന്നതിനായാണ് പോലീസിന്റെ ഈ നീക്കം. ജില്ലയില്‍ വിവിധയിടങ്ങളില്‍ നടന്ന പരിശോധനയില്‍ സ്വകാര്യബസ്സുകളും, കെഎസ്ആര്‍ടിസി ബസ്സുകളും പരിശോധിച്ചു. കഴിഞ്ഞദിവസം മാനന്തവാടി നഗരത്തിലൂടെ മദ്യലഹരിയില്‍ ബസ്സോടിച്ചയാളെ പോലീസ് അറസ്റ്റ് ചെയ്തിരുന്നു. യാത്രാ മധ്യേ നിരവധി വാഹനങ്ങള്‍ക്ക് ഇയ്യാള്‍ നാശനഷ്ടങ്ങള്‍ വരുത്തിയിരുന്നു. ഈ സംഭവത്തിന്റെ കൂടി പശ്ചാത്തലത്തിലാണ് ജില്ലാ പോലീസ് മേധാവി അരുള്‍ ആര്‍ബി കൃഷ്ണയുടെ പ്രത്യേക നിര്‍ദ്ദേശപ്രകാരം പരിശോധന ഊര്‍ജ്ജിതമാക്കിയത്. പരിശോധന വരുംദിനങ്ങളിലും തുടരുമെന്ന് പോലീസ് വൃത്തങ്ങള്‍ അറിയിച്ചു.
അഭിപ്രായങ്ങൾ (Comments)