സാമൂഹ്യ പ്രവര്‍ത്തകയെ സാമൂഹ്യ മാധ്യമത്തിലൂടെ അപമാനിച്ചതായി പരാതി ;പോലീസുകാരനെതിരെ കേസെടുത്തു
മാനന്തവാടി: സാമൂഹ്യ, മനുഷ്യാവകാശ പ്രവര്‍ത്തകയായ ശ്രീജ നെയ്യാറ്റിന്‍കരയെ സാമൂഹ്യമാധ്യമത്തിലൂടെ അപമാനിച്ചതായുള്ള പരാതിയുടെ അടിസ്ഥാനത്തില്‍ തിരുനെല്ലി പോലീസ് സ്‌റ്റേഷനിലെ ഗ്രേഡ് എ എസ് ഐ അനില്‍കുമാറിനെതിരെ കേസെടുത്തു. ശ്രീജ ഫെയിസ്ബുക്കിലിട്ട പോസ്റ്റുകള്‍ക്ക് താഴെ ലൈംഗിക ചുവയുള്ള ദ്വയാര്‍ത്ഥ പ്രയോഗങ്ങളും തെറി വിളികളും വ്യക്തിയധിക്ഷേപങ്ങളും നടത്തിയെന്ന പരാതിയെ തുടര്‍ന്ന് സ്ത്രീത്വത്തെ അപമാനിച്ചതിന് ഇന്ത്യന്‍ ശിക്ഷാ നിയമത്തിലെ വകുപ്പ് 509, ഐ.ടി ആക്ടിലെ 67 വകുപ്പ് ,കേരള പോലീസ് ആക്ടിലെ വകുപ്പ് 120 (ഒ) തുടങ്ങിയവ പ്രകാരമാണ് കേസ്.ശ്രീജ ആഭ്യന്തര മന്ത്രി, ഡി ജി പി, വയനാട് എസ് പി, മാനന്തവാടി ഡി വൈ എസ് പി, തിരുനെല്ലി പോലീസ് സ്‌റ്റേഷന്‍ എന്നിവിടങ്ങളില്‍ ഇയാള്‍ക്കെതിരെ പരാതി നല്‍കിയതിനെ തുടര്‍ന്നാണ് നടപടി. ശ്രീജയുടെപോസ്റ്റിന് താഴെ പോലീസുകാരന്‍ ലൈംഗികച്ചുവയോടെയുള്ളതും അല്ലാത്തതുമായ കമന്റുകള്‍ നടത്തിയതിന്റെ സ്‌ക്രീന്‍ഷോട്ട് ഉള്‍പ്പെടെയാണ് പരാതി നല്‍കിയത്.ഇതേ തുടര്‍ന്നാണ് പോലീസ് അന്വേഷണം നടത്തി കേസെടുത്തത് . കൊല്ലം സ്വദേശിയാണ് അനില്‍കുമാര്‍.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍