പുല്‍പ്പള്ളി: പ്രചരണത്തിനിടെ യു.ഡി.എഫ് സ്ഥാനാര്‍ത്ഥിക്ക് കോവിഡ്. പ്രചരണം ഏറ്റെടുത്ത് സുഹൃത്തുക്കളും സഹപ്രവര്‍ത്തകരും. പൂതാടി ഗ്രാമപഞ്ചായത്ത് ഒമ്പതാം വര്‍ഡ് യു.ഡി.എഫ് സ്ഥാനാര്‍ത്ഥി ജയന്‍ തൈപ്പറമ്പിലിനാണ് കഴിഞ്ഞ ദിവസം പൂതാടി ആരോഗ്യ കേന്ദ്രത്തില്‍ വെച്ച് നടന്ന പരിശോധനയില്‍ കൊവിഡ് സ്ഥിരീകരിച്ചത്. ഇതോടെ വീട്ടില്‍ തന്നെ ചികിത്സയില്‍ കഴിയുകയാണ്. ഭാര്യയും മകനും രോഗം സ്ഥിരീകരിച്ചിട്ടില്ലെങ്കിലും വീട്ടില്‍ തന്നെ നിരീക്ഷണത്തില്‍ കഴിഞ്ഞുവരികയാണ്. കടുത്ത പോരാട്ടം നടക്കുന്ന പൂതാടി ഗ്രാമപഞ്ചായത്തിലെ പാപ്ലശേരി വാര്‍ഡില്‍ കഴിഞ്ഞ തവണ എല്‍.ഡി.എഫായിരുന്നു വിജയിച്ചത്. ഇത്തവണ വാര്‍ഡ് പിടിച്ചെടുക്കാന്‍ ഉറച്ചായിരുന്നു ജയന്റെ പ്രചരണം. ഇതിനകം തന്നെ രണ്ട് തവണ വാര്‍ഡിലുടനീളം ജയന്‍ പ്രചരണം നടത്തിയിരുന്നു. മൂന്നാംഘട്ട പ്രചരണംശക്തമാക്കാനിരിക്കുന്നതിനിടെയാണ് അവിചാരിതമായി കൊവിഡ് സ്ഥിരീകരിക്കുന്നത്. ദിവസങ്ങള്‍ക്ക് മുമ്പ് കാറില്‍ സഞ്ചരിക്കുന്നതിനിടെയുണ്ടായ സമ്പര്‍ക്കത്തിലൂടെയാണ് രോഗബാധയുണ്ടായതെന്ന് ജയന്‍ പറഞ്ഞു. രോഗബാധയുണ്ടായതിനെ തുടര്‍ന്ന് തിരഞ്ഞെടുപ്പ് കഴിയും വരെ ഇനി ജയന്  പുറത്തിറങ്ങാനാവില്ല. അതേസമയം പാപ്ലശേരിയിലെ ജനങ്ങളുടെ പിന്തുണ പൂര്‍ണമായുണ്ടെന്നും, വിജയിക്കാനാവുമെന്നാണ് പ്രതീക്ഷയെന്നും അദ്ദേഹം പറഞ്ഞു