ടാര്‍ മിക്‌സിംഗ് പ്ലാന്റിന് മീനങ്ങാടി പഞ്ചായത്തിന്റെ സ്‌റ്റോപ്പ് മെമ്മോ
മീനങ്ങാടി:മീനങ്ങാടി പഞ്ചായത്തിലെ വാര്‍ഡ് 18 ല്‍ കാര്യമ്പാടി മണ്ടോക്കര എസ്‌റ്റേറ്റിലെ ടാര്‍ മിക്‌സിംഗ് പ്ലാന്റിന്റെ പ്രവര്‍ത്തനം നിര്‍ത്തിവെക്കുന്നതിന് മിനങ്ങാടി പഞ്ചായത്ത് നോട്ടീസ് നല്‍കി.എസ്‌റ്റേറ്റ് ഭൂമി അനധികൃതമായി തരം മാറ്റി പ്ലാന്റ് സ്ഥാപിക്കുന്നതിനെതിരെയും അത് സൃഷ്ടിക്കുന്ന മലിനീകരണം പരിഗണിച്ചും ഇടുങ്ങിയ റോഡിലൂടെ വലിയ ടോറസ് വാഹനങ്ങള്‍ പോകുമ്പോള്‍ ഉണ്ടാവുന്ന ഗതാഗത തടസ്സം കണക്കിലെടുത്തും പ്ലാന്റിന്റെ പ്രവര്‍ത്തനത്തിനെതിരെ തുടക്കം മുതല്‍ സമീപവാസികള്‍ ആക്ഷന്‍ കമ്മിറ്റി രൂപീകരിച്ച് ശക്തമായ പ്രതിഷേധം ഉയര്‍ത്തിയിരുന്നു.അധികാര സ്ഥാനങ്ങളില്‍ നിരന്തരം പരാതിപ്പെട്ടിട്ടും അനുകൂല നടപടികള്‍ ഉണ്ടാവാത്ത സാഹചര്യത്തില്‍ ആക്ഷന്‍ കമ്മറ്റി ഹൈക്കോടതിയെ സമീപിക്കുകയും പ്ലാന്റിന്റെ പ്രവര്‍ത്തനം സ്‌റ്റേ ചെയ്യുകയും ചെയ്തതാണെന്ന് ആക്ഷന്‍ കമ്മിറ്റി ഭാരവാഹികള്‍ പറഞ്ഞു.എന്നാല്‍ സ്‌റ്റേ ഉത്തരവിന്റെ അടിസ്ഥാനത്തില്‍ പഞ്ചായത്ത് നല്‍കിയ സ്‌റ്റോപ്പ് മെമ്മോ ചോദ്യം ചെയ്ത് പ്ലാന്‍ ടുടമ ഹൈക്കോടതിയില്‍ കേസ് ഫയല്‍ ചെയ്യുകയാണുണ്ടായത്. പ്രസ്തുത കേസില്‍ ഹരജിക്കാരന്റെ വാദഗതികള്‍ തള്ളിക്കൊണ്ടും പ്ലാന്റിനെ പ്രവര്‍ത്തനം തടഞ്ഞു കൊണ്ടുള്ളതുമാണ് ഇപ്പോഴത്തെ വിധി. വിധിയുടെ അടിസ്ഥാനത്തില്‍ പഞ്ചായത്ത് വീണ്ടും നല്‍കിയ നോട്ടീസ് തൃണവല്‍ക്കരിച്ച് പ്ലാന്റടമ അനുബന്ധ പ്രവര്‍ത്തനങ്ങള്‍ നിര്‍ബാധം തുടരുന്നതായി ആക്ഷന്‍ കമ്മിറ്റി കുറ്റപ്പെടുത്തി. വിധി നടപ്പിലാക്കേണ്ടവര്‍ ഉറക്കം നടിക്കുന്നതില്‍ പ്രദേശവാസികള്‍ക്കിടയില്‍ അമര്‍ഷം പുകയുകയാണെന്നും പ്രത്യക്ഷ സമരവുമായി രംഗത്ത് വരുമെന്നും ആക്ഷന്‍ കമ്മിറ്റി പ്രസ്താവനയില്‍ അറിയിച്ചു.
കമന്റ് ബോക്‌സില്‍ വരുന്ന അഭിപ്രായങ്ങള്‍ ഓപ്പൺന്യൂസറിന്റെത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍