മാനന്തവാടി:വയനാട് ജില്ല ഭക്ഷ്യ സുരക്ഷാ വകുപ്പിന്റേയും, ഫിഷറീസ് വകുപ്പിന്റേയും, മാനന്തവാടി മുനിസിപ്പാലിറ്റി വിഭാഗത്തിന്റേയും നേതൃത്വത്തില്‍ മാനന്തവാടി, കൊയിലേരി, പയ്യമ്പളളി, പുല്‍പ്പളളി, അമ്പലവയല്‍  തുടങ്ങിയ സ്ഥലങ്ങളിലെ മത്സ്യമാര്‍ക്കറ്റുകളിലും വ്യാപാര സ്ഥാപനങ്ങളിലും പരിശോധന നടത്തി.  മത്സ്യത്തില്‍ അമോണിയ, ഫോര്‍മാല്‍ഡിഹൈഡ് തുടങ്ങിയ രാസവസ്തുക്കളുടെ സാന്നിധ്യം മനസിലാക്കാന്‍ സെന്‍ട്രല്‍ ഫീഷറീസ് ടെക്‌നോളജി ഇന്‍സ്റ്റിറ്റിയൂട്ട് വികസിപ്പിച്ചെടുത്ത പ്രത്യേക ടെസ്റ്റ്   കിറ്റുകള്‍ ഉപയോഗിച്ചായിരുന്നു പരിശോധന. പരിശോധനയില്‍ കൊയിലേരി ടൗണിലെ മത്സ്യ വില്‍പ്പനശാലയില്‍ വില്‍പ്പനക്കായി സൂക്ഷിച്ചിരുന്ന മത്തിയിലും (5 കിലോഗ്രാം ) എരുന്ത് (കക്ക ഇറച്ചി) ലും (1.500 കിലോഗ്രാം) ഫോര്‍മാലിന്റെ സാന്നിധ്യം കണ്ടെത്തിയതിനെത്തുടര്‍ന്ന് മത്സ്യം പിടിച്ചെടുത്ത് നശിപ്പിച്ചു.  കുറ്റക്കാര്‍ക്കെതിരെ നിയമപരമായ നടപടി സ്വീകരിക്കുന്നതാണ് എന്ന് ഭക്ഷ്യ സുരക്ഷാ വകുപ്പ് അധികൃതര്‍ അറിയിച്ചു. മറ്റ് കേന്ദ്രങ്ങളിലൊന്നും തന്നെ മേല്‍ രാസവസ്തുക്കളുടെ സാന്നിദ്ധ്യം പരിശോധനയില്‍ കണ്ടെത്തിയില്ല.  മത്സ്യ വില്‍പ്പന നടത്തുമ്പോള്‍ കര്‍ശനമായ ഭക്ഷ്യ സുരക്ഷാ മാനദണ്ഡങ്ങള്‍ പാലിക്കണമെന്നും മത്സ്യം വില്‍പ്പന നടത്തുമ്പോള്‍ 50 ഃ 50 അനുപാതത്തില്‍ ഐസ് ഇട്ട് സൂക്ഷിക്കണമെന്നും അധികൃതര്‍ മുന്നറിയിപ്പ് നല്‍കി.  വരും ദിവസങ്ങളിലും പരിശോധന കര്‍ശനമാക്കുമെന്ന് അധികൃതര്‍ അറിയിച്ചു. ഭക്ഷ്യ സുരക്ഷാ ഓഫീസര്‍മാരായ സോമിയ, നിഷ പി. മാത്യു എന്നിവരും, ഫിഷറീസ് വകുപ്പ് അസിസ്റ്റന്റ് എക്സ്റ്റന്‍ഷന്‍ ഓഫീസര്‍ ആഷിക് ബാബു, ഫിഷറീസ് ഉദ്യോഗസ്ഥരായ ഗ്രഹാം തോമസ്, സന്ദീപ് കെ രാജു എന്നിവരും, മാനന്തവാടി    മുനിസിപ്പാലിറ്റി ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരും പരിശോധനയ്ക്ക് നേതൃത്വം നല്‍കി.  തുടര്‍ന്നുളള ദിവസങ്ങളിലും പരിശോധന കര്‍ശനമാക്കുമെന്ന് ഭക്ഷ്യ സുരക്ഷാ അസിസ്റ്റന്റ് കമ്മീഷണര്‍ അറിയിച്ചു.