മുത്തങ്ങ:നാടന്‍ തോക്കുമായി വനാതിര്‍ത്തിയിലെത്തിയ സി.ആര്‍.പി.എഫ് ജവാനും,  സുഹൃത്തും  വനംവകുപ്പിന്റെ പിടിയിലായി. സി.ആര്‍.പി.എഫ് 143 മണിപ്പൂര്‍ ബറ്റാലിയനിലെ ജവാന്‍ ചീരാല്‍ മുക്കുറ്റികുന്ന് പള്ളിക്കുന്ന് ടി.സുജേഷ് (38),സുഹൃത്ത്  ചീരാല്‍ കാട്ടുങ്ങല്‍ കെ.വിപിന്‍ (27) എന്നിവരാണ് അറസ്റ്റിലായത്.ഇവര്‍ സഞ്ചരിച്ചിരുന്ന കെ.എല്‍.04 എ.സി 5374 നമ്പര്‍ ബൈക്കും വനം വകുപ്പ് കസ്റ്റഡിയിലെടുത്തിട്ടുണ്ട്.ഇന്നലെ അര്‍ധരാത്രിയോടെ ഊട്ടി റോഡില്‍ നൂല്‍പ്പുഴക്കടുത്ത് മുണ്ടക്കൊല്ലിയില്‍ വെച്ചാണ് ഇരുവരും പിടിയിലായത്. നൈറ്റ് പട്രോളിങ്ങിനിടെ ഇരുവരും വനപാലകരുടെ കണ്ണില്‍പ്പെടുകയായിരുന്നു. ആയുധ നിയമപ്രകാരവും, മൃഗവേട്ടയ്ക്ക് ഗൂഢാലോചന നടത്തിയതിനും ഇരുവര്‍ക്കുമെതിരെ കേസെടുത്തതായി അസി.വൈല്‍ഡ് ലൈഫ് വാര്‍ഡന്‍ കെ.പി സുനില്‍ കുമാര്‍ പറഞ്ഞു.ഡെപ്യൂട്ടി റെയിഞ്ചര്‍ കെ.കെ സുന്ദരന്‍, സെക്ഷന്‍ ഫോറസ്റ്റ് ഓഫീസര്‍മാരായ ടി.കെ ശിവരാമന്‍, എം.ജെ രാഘവന്‍, എസ്.എഫ്.ഒ ഗ്രേഡ് ടി.എസ് വേണു, ബി.എഫ്.ഒ കെ.വി വിപിന്‍ തുടങ്ങിയവരുടെ നേതൃത്വത്തിലാണ് പ്രതികളെ പിടികൂടിയത്.